नेपाली कांग्रेसभित्र चुलिएको आन्तरिक विवाद समाधानका लागि सभापति गगन थापा र निवर्तमान कार्यवाहक सभापति पूर्णबहादुर खड्काबीच महत्त्वपूर्ण भेटवार्ता भएको छ। शनिबार साँझ भएको ‘वान टु वान’ भेटवार्तामा पार्टीभित्र देखिएका असन्तुष्टि र मागहरू सम्बोधन गर्ने विषयमा सहमति नजिक पुगेको स्रोतले जनाएको छ।

१५औँ महाधिवेशनका लागि नवीकरण तथा नयाँ लिइएका क्रियाशील सदस्यताको व्यवस्थापन र १४औँ महाधिवेशनबाट निर्वाचित केन्द्रीय सदस्यहरूको व्यवस्थापनलगायतका विषयमा दुई नेताबीच सकारात्मक छलफल भएको छ। नेता खड्काले उठाउँदै आएका मागहरू पूरा गर्न सभापति थापा सहमत भएपछि पार्टीभित्र देखिएको शक्तिसंघर्ष साम्य हुने र सहमति जुट्ने सम्भावना प्रबल बनेको छ।

विवादलाई पूर्ण रूपमा अन्त्य गर्न सभापति थापा र नेता डा. शेखर कोइरालाबीच आज पुनः भेटवार्ता हुँदैछ। नेता कोइरालाले क्रियाशील सदस्यताको सहज व्यवस्थापन, १४औँ महाधिवेशनपछिका सदस्यताको मान्यता, समितिहरूको गठन आपसी सहमतिमा गर्ने तथा दुवै कार्यकालका केन्द्रीय समितिलाई समायोजन गर्नेलगायतका ५ बुँदे प्रस्ताव अगाडि सारेका छन्।

यसैबीच, कांग्रेस प्रवक्ता देवराज चालिसेले पार्टीभित्रको आन्तरिक विवाद अन्त्य गर्न सभापति थापाले विभिन्न चरणमा शीर्ष नेताहरूसँग भेटघाट गरिरहेको पुष्टि गरेका छन्। आज दिउँसो १ बजे बस्ने पार्टीको कार्यसम्पादन समिति बैठकमा नेताहरूसँग भएका भेटवार्ता र सहमतिबारे औपचारिक ब्रिफिङ हुनेछ।

शीर्ष तहमा सहमति जुटेमा आगामी भदौ २४ गतेका लागि तय गरिएको १५औँ महाधिवेशनअन्तर्गतको वडा अधिवेशनको मिति केही समय पर सर्ने बलियो संकेत प्रवक्ता चालिसेले दिएका छन्।