संघीय मामिला तथा सामान्य प्रशासन मन्त्री राजकुमार गुप्ताले विवादास्पद अडियोकाण्डमा उल्लेख गरिएको रकम भैँसेपाटीस्थित मन्त्री क्वार्टरमै भेटिएको स्वीकार गरेका छन् । 

प्रधानमन्त्री केपी शर्मा ओलीलाई मौखिक स्पष्टीकरण दिँदै गुप्ताले उक्त रकम क्वार्टरमै भेटिएको बताउँदै आफूलाई फसाउन पूर्व योजनासहित अडियो तयार पारिएको हुन सक्ने दाबी गरेका छन् ।

सरुवा र नियुक्तिमा ७८ लाख रुपैयाँको घुस बार्गेनिङ सम्बन्धी अडियो सार्वजनिक भएपछि प्रधानमन्त्री ओली मन्त्री गुप्ताविरुद्ध कारबाहीको तयारीमा लागेका छन् । स्रोतका अनुसार प्रधानमन्त्रीले गुप्तासँग प्रारम्भिक सोधपुछ गरिसकेका छन् र उनको जवाफ चित्तबुझ्दो नलागेपछि राजीनामा गराउने तयारी गरिएको छ ।

मन्त्री गुप्ताले पैसा नागरिक उन्मुक्ति पार्टीकी अध्यक्ष रञ्जिता श्रेष्ठ र उनका मान्छेले फसाउनकै नियतले छाडेको दाबी गरेका छन् । उनका अनुसार श्रेष्ठ बिहान ६ बजे मन्त्री क्वार्टरमा आएकी थिइन् र पैसाको झोला छाडेर गएकी थिइन् । त्यसपछि आफू अनुकूल अडियो रेकर्ड गरी सार्वजनिक गरिएको गुप्ताको भनाइ छ ।

गुप्ताले सो आरोप लगाउँदै प्रधानमन्त्रीलाई स्पष्टीकरण दिएका छन् । तर प्रधानमन्त्री ओलीका निकट स्रोतका अनुसार, प्रधानमन्त्री अब झापाबाट फर्किएपछि कडा निर्णय लिन सक्ने सम्भावना रहेको छ ।

अडियो प्रकरणबारे संसदमा पनि आवाज उठेको छ । माओवादी केन्द्रकी सांसद ज्ञानु बस्नेत सुवेदीले प्रतिनिधिसभाको शून्य समयमा गम्भीर भ्रष्टाचारको आरोपमा दुई मन्त्रीको नाम जोडिँदा पनि सरकार मौन बस्नु दुःखद भएको बताउँदै तत्काल छानबिन र कारबाहीको माग गरेकी छन् ।

उनका अनुसार, अडियोमा कास्की मालपोत प्रमुखको सरुवा रोक्न ५३ लाख र भूमि आयोग अध्यक्ष नियुक्तिका लागि २५ लाख रुपैयाँ डिल गरिएको उल्लेख छ । यस प्रकरणमा भूमि व्यवस्था, सहकारी तथा गरिबी निवारण मन्त्री बलराम अधिकारीको समेत नाम जोडिएको छ ।

यता, गुप्ताले सार्वजनिक अडियो कृत्रिम बौद्धिक प्रणाली (AI) प्रयोग गरेर बनाइएको हो भन्ने दाबी गर्दै आरोप प्रमाणित गर्न चुनौती दिएका छन् । उनले सामाजिक सञ्जालमार्फत आफूमाथिको आरोपहरू ‘राजनीतिक षड्यन्त्र’ भएको बताउँदै अस्वीकार गरेका छन् ।