लगातारको वर्षा, बाढी, पहिरो तथा सडक मर्मत कार्यका कारण देशका विभिन्न भागमा मुख्य राजमार्गहरू नराम्ररी प्रभावित भएका छन्। नेपाल प्रहरीको पछिल्लो तथ्यांक अनुसार केही प्रमुख सडक खण्डहरू पूर्ण रूपमा ठप्प छन् भने कतिपय स्थानमा एकतर्फी मात्र सवारी सञ्चालन भइरहेको छ।

काठमाडौँ–मकवानपुर जोड्ने दुई सडक एक महिना बन्द
काठमाडौँ र मकवानपुर जोड्ने दुई महत्त्वपूर्ण वैकल्पिक सडकहरू मर्मतका लागि लामो समय बन्द रहने भएका छन्। काठमाडौँको चन्द्रागिरी नगरपालिका–९ देउराली देविस्थानस्थित सतुङ्गल–चित्लाङ सडक खण्ड र मकवानपुरको इन्द्रसरोवर गाउँपालिकास्थित कुलेखानी–फाखेल–हुमाने–फर्पिङ सडक खण्ड स्तरोन्नतिका लागि एक महिनाका लागि पूर्ण रूपमा बन्द गरिएको छ।

बीपी राजमार्गमा सवारी रोक
यसैगरी, बीपी राजमार्ग अन्तर्गत काभ्रेपलाञ्चोकको खुर्कोट–नेपालथोक–कटुञ्जेबेंसी खण्डमा सम्भावित बाढीको जोखिमलाई मध्यनजर गर्दै सवारी साधन सञ्चालनमा रोक लगाइएको छ। नदीमा पानीको बहाव बढेसँगै दुर्घटना टार्न प्रहरीले उक्त कदम चालेको हो।

कोशी प्रदेश: मध्य पहाडी लोकमार्ग एकतर्फी
कोशी प्रदेशका दुई जिल्लामा मध्य पहाडी लोकमार्गको यातायात प्रभावित भएको छ। भोजपुर नगरपालिका–५ बोखिम र पाँचथरको याङवरक गाउँपालिका–२ दोभानमा बाढी र पहिरोका कारण सडकमा क्षति पुगेको छ। हाल यी दुवै स्थानमा सडक एकतर्फी मात्र सुचारु रहेको छ। भोजपुरमा भने यात्रुहरूलाई वैकल्पिक बाटो प्रयोग गर्न समेत आग्रह गरिएको छ।

सहिद राजमार्ग पूर्ण अवरुद्ध
उता, लुम्बिनी प्रदेशको रोल्पा जिल्लामा पहिरोका कारण यातायात सेवा पूर्ण रूपमा ठप्प भएको छ। परिवर्तन गाउँपालिका–१ बाङ्गास्थित सहिद राजमार्गमा विशाल पहिरो खस्दा सडक अवरुद्ध भएको हो। सडक अवरोध भएसँगै सो क्षेत्रको जनजीवन र लामो दूरीका यात्रुहरू मर्कामा परेका छन्। प्रहरी र स्थानीय प्रशासनले सडक खुलाउने प्रयास गरिरहेका छन्।