पेरिस सेन्ट जर्मेन (पीएसजी) ले एस्टन भिल्लालाई २–१ गोलले पराजित गर्दै लगातार दोस्रोपटक यूईएफए सुपर कपको उपाधि जितेको छ।

बुधबार साल्जबर्गमा सम्पन्न फाइनल खेलमा पीएसजीको जितका लागि डिजिरे डुएले दोस्रो हाफमा निर्णायक गोल गरे। खेलको ६१औँ मिनेटमा ओस्मान डेम्बेलेको पासलाई सदुपयोग गर्दै डुएले गोल गरेका थिए। सुरुमा अफसाइड दिइएको उक्त गोल भिडियो असिस्टेन्ट रेफ्री (भीएआर) समीक्षापछि मान्यता पाएको थियो, जहाँ एस्टन भिल्लाका म्याटी क्यासले डुएलाई झिनो अन्तरले अनसाइडमा राखेको ठहर भएको थियो।

त्यसअघि, खेलको २०औँ मिनेटमा ख्विचा क्वारात्स्खेलियाको शक्तिशाली प्रहारमार्फत पीएसजीले अग्रता लिएको थियो। तर, एस्टन भिल्लाका १७ वर्षीय युवा स्ट्राइकर ब्रायन माड्जोले उत्कृष्ट भलीमार्फत गोल गर्दै खेललाई बराबरीमा ल्याएका थिए। फिफासँगको दर्तासम्बन्धी विवाद समाधान भएपछि खेल्ने अनुमति पाएका माड्जो सुपर कपको फाइनलमा सुरुआती रोजाइमा परेर गोल गर्ने सबैभन्दा कम उमेरका खेलाडी बनेका छन्।

यो जितसँगै पीएसजी रियल मड्रिडपछि लगातार दुईपटक सुपर कप जित्ने पहिलो टोली बनेको छ। यसअघि रियलले सन् २०१६ र २०१७ मा लगातार यो उपाधि जितेको थियो। च्याम्पियन्स लिग विजेता पीएसजी र युरोपा लिग विजेता एस्टन भिल्लाबीचको यो भिडन्तलाई युरोपेली फुटबल सिजनको प्रमुख सुरुआतका रूपमा लिइन्छ। पीएसजीका लागि यो चालु सिजनको सम्भावित ६ उपाधिमध्ये पहिलो हो।

यस खेलमा सोमालियाका ओमार आर्टानले निर्णायक ९रेफ्री० को भूमिका निर्वाह गर्दै सुपर कप फाइनल सञ्चालन गर्ने पहिलो गैर–युरोपेली रेफ्रीको कीर्तिमान बनाएका छन्। उनले खेलमा एस्टन भिल्लाका खेलाडीहरूलाई मात्र लक्षित गर्दै तीन वटा पहेँलो कार्ड देखाएका थिए।