सुदूरपश्चिम प्रदेशका मुख्यमन्त्री खगराज भट्टले मुक्त कमैयाहरूको आवास तथा जीविकोपार्जनसँग जोडिएका समस्याहरू स्थायी रूपमा समाधान गर्न प्रदेश सरकार गम्भीर रहेको बताएका छन्।

आफ्नो आवाससहित गाँस र बासको समस्या समाधान गरिदिन माग गर्दै मुख्यमन्त्री निवास पुगेको मुक्त कमैयाहरूको प्रतिनिधिमण्डलसँगको भेटमा मुख्यमन्त्री भट्टले यस्तो प्रतिबद्धता व्यक्त गरेका हुन्। लामो समयदेखि विभिन्न समस्या झेल्दै आएका मुक्त कमैयाहरूको जीवनस्तर सुधार र पुनःस्थापनाको विषयलाई सरकारले उच्च प्राथमिकतामा राखेको उनले बताए।

मुक्त कमैयाहरूको आवासलगायत अन्य सम्पूर्ण समस्या समाधानका लागि आगामी बजेटमै ठोस र आवश्यक व्यवस्था गरिने मुख्यमन्त्री भट्टले आश्वासन दिएका छन् ।

भेटघाट कार्यक्रममा कृषि मन्त्री दमनबहादुर भण्डारी, भौतिक पूर्वाधार राज्यमन्त्री जानकीदेवी कुँवर, कृषि मन्त्रालयका कर्मचारीहरू, नापी शाखा कैलालीका प्रमुख, मालपोत कार्यालय कैलालीका प्रमुखलगायत सम्बन्धित सरोकारवालाहरूको सहभागिता रहेको थियो।