थाइल्यान्डको संवैधानिक अदालतले कम्बोडियाका पूर्वप्रधानमन्त्री तथा हालका सिनेट अध्यक्ष हुन सेनसँगको फोन कललाई संवैधानिक र नैतिक उल्लङ्घन ठहर गर्दै प्रधानमन्त्री पेटोङटार्न सिनावात्रालाई पदबाट बर्खास्त गरेको छ।

शुक्रबार अदालतले दिएको फैसलासँगै पेटोङटार्नले आफ्नो करिब एक वर्ष लामो कार्यकाल गुमाएकी छिन्। उनीविरुद्ध मुद्दा दायर भएपछि अदालतले गत जुलाई १ मा नै उनलाई निलम्बन गरेको थियो। त्यसयता उपप्रधानमन्त्री फुमथम वेचाचाई कार्यवाहक प्रधानमन्त्रीका रूपमा जिम्मेवारी सम्हालिरहेका छन्।

पेटोङटार्नले गत जुन १५ मा हुन सेनसँग गरेको फोन कल दुई मुलुकबीचको सीमा विवादमा तनाव कम गर्ने उद्देश्यले भएको बताइए पनि अदालतले त्यसलाई राष्ट्रिय सुरक्षाप्रति असावधानी र थाई सेनाका जनरलहरूको बदनामी हुनेगरी भएको गतिविधि भनेको छ।

थाइल्यान्ड–कम्बोडिया सीमा क्षेत्रमा गत मे महिनामा भएको झडपमा कम्बोडियाका एक सैनिकको मृत्यु भएको थियो। त्यसपछिको छोटो युद्धमा दर्जनौँ मानिस मारिएका थिए भने दुई लाख ६० हजारभन्दा बढी विस्थापित भएका थिए।

अदालतको फैसलाले पेटोङटार्नको नेतृत्वमा रहेको सत्तारूढ फेउ थाई गठबन्धन सरकारलाई अस्थिर अवस्थामा पुर्‍याएको छ। फोन कल विवादपछि प्रमुख साझेदार भुमजाइथाई पार्टी गठबन्धनबाट बाहिरिएपछि फेउ थाईसँग प्रतिनिधि सभामा थोरै मात्र बहुमत बाँकी छ।

यो कदम पेटोङटार्नका पिता तथा पूर्वप्रधानमन्त्री थाक्सिन सिनावात्राका राजनीतिक प्रभावका लागि पनि ठूलो झटका मानिएको छ। थाक्सिनलाई सन् २००६ मा सैनिक कूदमार्फत सत्ता च्युत गरिएको थियो।