दक्षिण कोरियाका पूर्वराष्ट्रपति युन सुक योललाई अदालतले शुक्रबार न्यायमा बाधा पुर्‍याउने र प्रमाण नष्ट गर्ने जस्ता गम्भीर अभियोगमा दोषी ठहर गर्दै पाँच वर्षको जेल सजाय सुनाएको छ।

डिसेम्बर २०२४ मा देशमा मार्शल ल लागू गर्ने असफल प्रयासपछि युन सुक योल पदबाट हटाइएका थिए। अदालतका अनुसार मार्शल ल घोषणाका क्रममा उनले कानुनी प्रक्रिया पालना नगरेको, आधिकारिक कागजातमा जालसाजी गरेको, फोन डाटा मेटाएर प्रमाण नष्ट गरेको तथा आफ्नै गिरफ्तारी रोक्न सुरक्षाकर्मीहरूको काममा अवरोध पुर्‍याएको आरोप प्रमाणित भएको छ।

युन सुक योलले डिसेम्बर २०२४ मा अचानक मार्शल ल घोषणा गर्दा देशभर ठूलो राजनीतिक हलचल मच्चिएको थियो। उनले विपक्षी र राज्यविरोधी शक्तिबाट लोकतन्त्र जोगाउन यस्तो कदम चालेको दाबी गरे पनि उनकै पार्टीका सांसद र विपक्षी दलको समर्थनमा संसदले मात्र छ घण्टामै उक्त निर्णय खारेज गरेको थियो।

मार्शल ल असफल भएपछि युन सुक योल आफ्नै निवासमा थुनिएर बसेका थिए। पछि करिब तीन हजार प्रहरी परिचालन गरी उनलाई गिरफ्तार गरिएको थियो। यो घटना दक्षिण कोरियाको इतिहासमा कार्यरत राष्ट्रपतिलाई पक्राउ गरिएको पहिलो घटना बनेको थियो।

युन सुक योलविरुद्ध अझै राजद्रोहको योजना बनाएको आरोपमा अर्को गम्भीर मुद्दा विचाराधीन छ। सो मुद्दामा अभियोजकहरूले मृत्युदण्डको माग गरेका छन्, जसको फैसला फेब्रुअरीमा आउने अपेक्षा गरिएको छ।

यसैबीच, गत वर्ष जुनमा सम्पन्न निर्वाचनपछि विपक्षी लोकतान्त्रिक पार्टीका नेता ली जेइ म्युङ दक्षिण कोरियाका नयाँ राष्ट्रपतिका रूपमा सत्तामा आएका छन्।