कतारको तरल प्राकृतिक ग्यास (एलएनजी) बोकेको एक विशाल ट्यांकर स्ट्रेट अफ होर्मुज पार गर्दै पाकिस्तानतर्फ प्रस्थान गरेको छ । जहाज निगरानीसम्बन्धी तथ्यांकले यसको पुष्टि गरेका हुन् । ‘अल खराइतियात’ नामक उक्त ट्यांकर इरान र अमेरिकाबीच फेब्रुअरी अन्त्यदेखि बढ्दो तनावपछि होर्मुज जलडमरूमध्य पार गर्ने कतारी स्वामित्व तथा सञ्चालनमा रहेको पहिलो जहाज बनेको जलयातायात विश्लेषकहरूले बताएका छन् ।

आइतबार बिहान ४ बजे (ईटी समयअनुसार) उक्त जहाज गल्फ अफ ओमान क्षेत्रमा रहेको बताइएको छ ।

मरिन ट्राफिकका अनुसार जहाजले इरानद्वारा स्वीकृत उत्तरी समुद्री मार्ग प्रयोग गर्दै क्वेश्म टापुनजिकबाट होर्मुज पार गरेको थियो ।
२ लाख घनमिटरभन्दा बढी एलएनजी बोक्न सक्ने ‘अल खराइतियात’ ले यस महिनाको सुरुआतमा कतारको रस लफान निर्यात केन्द्रबाट ग्यास लोड गरेको थियो ।

सामान्य अवस्थामा विश्वको करिब २० प्रतिशत एलएनजी आपूर्ति गर्ने कतार हाल क्षेत्रीय द्वन्द्वका कारण दबाबमा परेको छ । द्वन्द्वकै असरस्वरूप कतारको ग्यास उत्पादन प्रभावित भएको तथा प्रमुख ग्यास पूर्वाधारमा क्षति पुगेको अन्तर्राष्ट्रिय सञ्चारमाध्यमहरूले जनाएका छन् ।