संयुक्त राष्ट्रसंघको ८१औँ महासभामा भाग लिन अमेरिकाको न्युयोर्क पुग्नुभएका प्रधानमन्त्री बालेन्द्र (बालेन) शाह र संयुक्त राष्ट्रसंघका महासचिव एन्टोनियो गुटेरेसबिच उच्चस्तरीय भेटवार्ता भएको छ।

भेटका क्रममा प्रधानमन्त्री शाहले नेपालप्रतिको सद्भावका लागि महासचिव गुटेरेसलाई धन्यवाद ज्ञापन गर्दै उनको सफल कार्यकालको सफलताको कामना गर्नुभयो। त्यस अवसरमा उहाँले रसुवाको भोटेकोशी नदीमा आएको विनाशकारी बाढीबाट नेपालले ठूलो जनधनको क्षति बेहोरेको यथार्थ राख्दै नेपालमा हिमताल फुट्ने जोखिम अझै उच्च रहेको गम्भीर ध्यानाकर्षण गराउनुभयो।

जवाफमा महासचिव गुटेरेसले भोटेकोशी विपद्मा भएको क्षतिप्रतिको गहिरो समवेदना व्यक्त गर्दै जलवायु परिवर्तनका मुद्दामा संयुक्त राष्ट्रसङ्घ सधैँ नेपालको पक्षमा र ऐक्यबद्ध रहेको स्पष्ट पार्नुभयो। साथै, उहाँले नेपालबाट सहभागी युवा प्रतिनिधिमण्डलको उच्च प्रशंसा गर्नुभयो।

प्रधानमन्त्रीको कार्यभार सम्हालेयताको यो पहिलो विदेश भ्रमण हो। उहाँ महासभामा सहभागिताका लागि बुधबार राति अमेरिका प्रस्थान गर्नुभएको थियो भने पूर्वतालिका अनुसार आगामी असोज १० गते स्वदेश फर्कनुहुनेछ।