अमेरिकी राष्ट्रपति डोनाल्ड ट्रम्पले दक्षिण कोरियासँगको संयुक्त सैन्य अभ्यासमा व्यापक कटौती गर्ने घोषणा गरेका छन्। उत्तर कोरियाली नेता किम जोङ उनसँग आफ्नो एकदमै राम्रो सम्बन्ध रहेको उल्लेख गर्दै ट्रम्पले सामाजिक सञ्जालमार्फत यस्तो घोषणा गरेका हुन्।

ट्रम्पले ‘ट्रुथ सोसल’मा लेख्दै यी सैन्य अभ्यासहरू अत्यन्तै खर्चिला हुनुका साथै अनुपयुक्त र शत्रुतापूर्ण सन्देश दिने खालका रहेको बताएका छन्। उनले संयुक्त राज्य अमेरिकाले यसको ठुलो आर्थिक भार व्यहोर्नुपरेको उल्लेखसमेत गरेका छन्। साथै, इरानको निःशस्त्रीकरणको विषयमा संयुक्त राज्य अमेरिकालाई साथ दिन आग्रह गर्दा दक्षिण कोरियाले अस्वीकार गरेको विषयमा पनि उनले असन्तुष्टि व्यक्त गरेका छन्।

सोमबारदेखि सुरु हुने भनिएको वार्षिक सैन्य अभ्यास रद्द गर्न ढिला भइसकेको भए पनि भविष्यमा यसलाई घटाउने ट्रम्पको भनाइ छ। अर्कातर्फ, दक्षिण कोरियाले भने अमेरिकासँगको संयुक्त सैन्य अभ्यास निर्धारित तालिकाअनुसार नै अघि बढ्ने स्पष्ट पारेको छ।

यसअघि नै उत्तर कोरियाले उक्त संयुक्त अभ्यासलाई आक्रमणको पूर्वअभ्यास भन्दै कडा भर्त्सना गर्दै आएको थियो।