दक्षिण कोरियाको राष्ट्रपतीय निर्वाचनमा वामपन्थी लिबरल डेमोक्रेटिक पार्टी अफ कोरिया (डीपीके) का नेता ली जे म्युङ विजयी भएका छन् । उनले सत्तारूढ पिपुल पावर पार्टी (पीपीपी) का उम्मेदवार किम मुन सुलाई पराजित गर्दै देशको नयाँ राष्ट्रपतिको जिम्मेवारी सम्हाल्न लागेका हुन् ।

निर्वाचन परिणामअनुसार लीले ४८.३१ प्रतिशत मत प्राप्त गरेका छन् भने उनका प्रतिस्पर्धी किम मुन सुले ४२.९ प्रतिशत मतमा सीमित भए । कुल ६ जना उम्मेदवारमध्ये मुख्य प्रतिस्पर्धा डीपीके र पीपीपीबीच मात्र सीमित भएको देखिएको थियो ।

विजयपछि एक सम्बोधनमा लीले भने, “म मतदातालाई धन्यवाद दिन्छु । म यो जिम्मेवारी कहिल्यै बिर्सने छैन र देशलाई एकताबद्ध गर्न, अर्थतन्त्र सुधार गर्न र उत्तर कोरियासँग शान्ति स्थापना गर्न प्रतिबद्ध भएर काम गर्नेछु ।”

उनका प्रतिस्पर्धी किम मुन सुले पराजय स्वीकृत गर्दै भने, “म जनताको निर्णयलाई विनम्रतापूर्वक स्वीकार गर्दछु र ली जे म्युङलाई विजयको शुभकामना दिन्छु ।”

यो निर्वाचनमा मतदाता सहभागिता उल्लेखनीय रहेको छ । कुल ७८.३ प्रतिशत मतदाता सहभागी भएका थिए, जुन १९९७ पछि हालसम्मकै उच्च हो । सन् २०२२ को राष्ट्रपति निर्वाचनमा ७७.१ प्रतिशत मतदान भएको थियो भने सन् १९८७ को ऐतिहासिक निर्वाचनमा सर्वाधिक ८९.२ प्रतिशत मत खसेको थियो ।

हालैको निर्वाचन समयभन्दा अघि गरिएको हो । यो निर्वाचनको आवश्यकता राष्ट्रपति युन सुक येओलको पदच्युतिसँग जोडिएको छ । सत्तारूढ पीपीपीका युनले गत डिसेम्बरमा देशमा ‘मार्शल ल’ (सैन्य आपतकालीन अवस्था) घोषणा गरेका थिए । उनले यसको कारण राज्य विरोधी गतिविधि र उत्तर कोरियाबाटको खतरा बताए पनि धेरैले यसलाई आफ्नो पद सुरक्षित गर्न चालिएको कदमको रूपमा व्याख्या गरेका थिए ।

तर, त्यो निर्णय उल्टिएन मात्रै एक सातापछि संसदले युनमाथि महाभियोग लगायो र २०७९ सालको वैशाख ४ गते संवैधानिक अदालतले महाभियोगलाई सदर गर्दै उनलाई स्थायी रूपमा पदबाट हटाएको थियो । संविधानअनुसार ६० दिनभित्र नयाँ निर्वाचन गर्नुपर्ने प्रावधान रहेकाले समयमै निर्वाचन सम्पन्न गरिएको हो।

लीको विजयसँगै दक्षिण कोरियाले राजनीतिक अस्थिरताबाट मुक्त हुँदै नयाँ नेतृत्वको यात्रातर्फ कदम अघि बढाएको छ ।