बेलायत सरकारले १६ र १७ वर्ष उमेरका युवाहरूलाई मतदानको अधिकार दिने घोषणा गरेको छ। यो निर्णयलाई देशको लोकतान्त्रिक विकासको इतिहासमा एउटा महत्वपूर्ण मोडको रूपमा लिइएको छ।

यो नयाँ व्यवस्थासँगै करिब १६ लाख किशोर-किशोरीहरूलाई मतदाता सूचीमा समावेश गरिनेछ। बेलायतको कुल जनसंख्या ६ करोड ८० लाख रहेको छ, जसअनुसार यो पछिल्लो ५० वर्षयताकै सबैभन्दा ठूलो मतदाता विस्तार भएको बताइएको छ।

यसअघि सन् १९६९ मा बेलायतले पहिलोपटक मतदानको उमेर २१ बाट घटाएर १८ वर्ष पुर्‍याएको थियो। त्यस्तै स्कटल्याण्ड र वेल्सजस्ता क्षेत्रमा पहिले नै १६ वर्षमा स्थानीय निर्वाचनमा मतदान गर्न पाउने व्यवस्था थियो। तर अब यो नीति पूरा बेलायतभर लागू गरिनेछ।

अन्य देशहरूको अवस्था

बेलायत मात्र होइन, विश्वका थुप्रै देशहरूले पनि १६ वा १७ वर्षको उमेरमै युवाहरूलाई मतदान अधिकार दिएका छन्।

१६ वर्षमै मतदान गर्न दिने देशहरू: अस्ट्रेलिया, ब्राजिल, अर्जेन्टिना, माल्टा, क्युवा, इक्वेडर, निकारागुआ, बेलायतका विशेष क्षेत्रहरू — आइल अफ म्यान, ग्वेर्नसे, जर्सी, फकल्याण्ड टापु रहेका छन् । यी देशहरूमा कतिपयले ऐच्छिक मतदान नीति अपनाएका छन् भने केहीले अनिवार्य मतदान व्यवस्था राखेका छन्।

उदाहरणका लागि, ब्राजिलमा १६ र १७ वर्ष उमेर समूहका युवाहरूका लागि मतदान ऐच्छिक छ तर १८ देखि ७० वर्षसम्मका नागरिकका लागि अनिवार्य छ।

बेलायतको नयाँ निर्णयले युवाहरूलाई राष्ट्रिय निर्णय प्रक्रियामा प्रत्यक्ष सहभागिता जनाउने अवसर प्रदान गरेको छ। विश्लेषकहरूका अनुसार, यसले न केवल लोकतान्त्रिक अभ्यासलाई बलियो बनाउनेछ, तर युवाको राजनीतिक चेतना र सक्रियतामा समेत वृद्धि गराउनेछ।