देशका विभिन्न स्थानमा भएका छुट्टाछुट्टै सडक दुर्घटनामा तीन जनाको ज्यान गएको छ।
दाङको लमही नगरपालिका–२ बदुवा गाउँस्थित सडकमा आइतबार दिउँसो लुम्बिनी प्रदेश ०२–००१ च ००२८ नम्बरको कारले ठक्कर दिँदा त्यही ठाउँका ७० वर्षीय भगवानदिन चौधरीको मृत्यु भएको हो। गम्भीर घाइते भएका चौधरीलाई उपचारका लागि बुटवलस्थित लुम्बिनी सिटी अस्पताल लगिएकोमा उपचारकै क्रममा मृत्यु भएको प्रहरीले जनाएको छ।
मकवानपुरको बकैया गाउँपालिका–६ खोपिल्टोमा शनिबार दिउँसो खेत जोत्ने क्रममा ना.६ त ८९९९ नम्बरको ट्र्याक्टर दुर्घटनामा परी चालक बारा निजगढ नगरपालिका–१२ रामथलीका ३३ वर्षीय बुद्धिलाल थिङको घटनास्थलमै मृत्यु भएको छ।
यस्तै, बाँकेको जानकी गाउँपालिका–४ नहरचोकमा शनिबार राति हाल नम्बर नखुलेको मोटरसाइकलको ठक्करबाट त्यही ठाउँका शुभ प्रसाद सोनीका ९ वर्षीय छोरा सुमर कुमार सोनी गम्भीर घाइते भएका थिए। उनलाई संजिवनी कलेज अफ मेडिकल साइन्सेज, नेपालगञ्ज पुर्याइएकोमा उपचारकै क्रममा मृत्यु भएको हो।
घटनापछि मोटरसाइकल र चालक फरार रहेका छन्। प्रहरीले तीव्र खोजी कार्यसँगै तीनै घटनाबारे आवश्यक अनुसन्धान गरिरहेको जनाएको छ।
तपाईको प्रतिक्रिया दिनुहोस