भरतपुर महानगरपालिका–१ आँपटारीचोकमा तीन वटा सवारीसाधन एकआपसमा ठोक्किँदा १५ जना घाइते भएका छन्।

जिल्ला प्रहरी कार्यालयका प्रहरी नायब उपरीक्षक रवीन्द्र खनालका अनुसार मुग्लिनबाट नारायणगढतर्फ आउँदै गरेको ग१ख ९९२५ नम्बरको बस र विपरीत दिशाबाट जाँदै गरेको लु१च ८५५२ नम्बरको बलेरो ठोक्किएका थिए। सोही क्रममा पछाडिबाट आइरहेको बा प्र ०३–००१ ह २५४८ नम्बरको अटोसमेत बलेरोमा ठोक्किन पुगेको थियो।

दुर्घटनामा घाइतेमध्ये १४ जना बसमा सवार यात्रु र एक जना अटोचालक रहेका छन्। घाइतेमध्ये सात जनाको भरतपुर अस्पताल, चार जनाको चितवन मेडिकल कलेज र चार जनाको नेसनल सिटी अस्पतालमा उपचार भइरहेको प्रहरीले जनाएको छ।