देशका विभिन्न स्थानमा बिहीबार र शुक्रबार भएका छुट्टाछुट्टै सवारी दुर्घटनामा परी ४ जनाको मृत्यु भएको छ। झापा, नवलपरासी (पश्चिम), कास्की र महोत्तरीमा भएका दुर्घटनामा उनीहरूको ज्यान गएको हो।

झापा: बाह्रदशी गाउँपालिका-३ मा मोटरसाइकलको ठक्करबाट साइकलयात्री ५० वर्षीय प्रेम बहादुर पौडेलको मृत्यु भएको छ। घोडामाराबाट राजगढतर्फ आउँदै गरेको प्र.१-०१-०१९ प २६९४ नम्बरको मोटरसाइकलले उनलाई ठक्कर दिएको थियो। घाइते पौडेलको विर्तासिटी अस्पतालमा उपचारका क्रममा मृत्यु भएको हो। मोटरसाइकल चालकको सोही अस्पतालमा उपचार भइरहेको छ।

नवलपरासी (पश्चिम): सरावल गाउँपालिका-३ मा रोकिराखेको लु.२ ख ३७९ नम्बरको ट्रकमा लु.४५ प १४३० नम्बरको मोटरसाइकल ठोक्किँदा २२ वर्षीय टेकेन्द्र चौधरीको मृत्यु भएको छ। जिल्ला अस्पताल परासीमा उपचारका क्रममा उनको मृत्यु भएको हो। ट्रक चालक प्रहरी नियन्त्रणमा छन्।

कास्की: पोखरा महानगरपालिका-१४ मा ट्याक्सीमा स्कुटर ठोक्किँदा १७ वर्षीय संयोग भण्डारीको मृत्यु भएको छ। ग.१ ज ९९३ नम्बरको ट्याक्सीमा ग.१५ प ५०५ नम्बरको स्कुटर ठक्कर खाएको थियो। उपचारका क्रममा जिएमसी अस्पतालमा उनको मृत्यु भएको हो। प्रहरीले ट्याक्सी र स्कुटर चालक दुवैलाई नियन्त्रणमा लिएको छ।

महोत्तरी: बलवा नगरपालिका-९ मा ट्याक्टर अनियन्त्रित भई दुर्घटना हुँदा चालक २६ वर्षीय सफिकुल नदाफको मृत्यु भएको छ। प्रादेशिक अस्पताल जलेश्वरमा उपचारका क्रममा उनको मृत्यु भएको हो।

सम्बन्धित सबै घटनाबारे प्रहरीले आवश्यक अनुसन्धान गरिरहेको छ।