देशभरका विभिन्न स्थानमा पछिल्लो ५ दिनको अवधिमा भएका छुट्टाछुट्टै सवारी दुर्घटनामा परी १७ जनाले ज्यान गुमाएका छन्। तीव्र गति, सवारीसाधनको अनियन्त्रित चाल र लापरवाहीका कारण देशका विभिन्न जिल्लामा भएको दुर्घटनामा कैयौँ नागरिकको मृत्यु हुनुका साथै दर्जनौँ घाइते भएका छन्।
प्रहरी प्रधान कार्यालयबाट प्राप्त विवरणअनुसार साउन २६ गतेदेखि ३० गतेसम्मको अवधिमा भएका प्रमुख दुर्घटनाहरूको विवरण यसप्रकार छ ।
साउन २६ गते कपिलवस्तुको कपिलवस्तु नगरपालिका-७ मा रोकिराखेको मिनि ट्रकमा मोटरसाइकल ठोक्किँदा २३ वर्षीय सन्तोष कहारको मृत्यु भयो भने अन्य दुई जना घाइते भए। सोही दिन सप्तरीको रूपनी गाउँपालिका-१ मा मोटरसाइकल अनियन्त्रित भई दुर्घटना हुँदा ६५ वर्षीय रामप्रसाद यादवको ज्यान गयो। यसैगरी कास्कीको पोखरा-२५ हेम्जामा मोटरसाइकल दुर्घटना हुँदा १६ वर्षीय अनिल विकको मृत्यु भयो भने धनुषाको धनुषाधाम-७ मा टिपरले मोटरसाइकललाई ठक्कर दिँदा ४० वर्षीय ईश्वरदेव राउतको मृत्यु भयो।
साउन २७ गते रुकुम पश्चिमको त्रिवेणी गाउँपालिका-१० मा ईभी भ्यानको ठक्करबाट ६५ वर्षीया काली विटालुको मृत्यु भयो। सिन्धुलीको मरिण गाउँपालिका-२ मा अज्ञात सवारीसाधनको ठक्करबाट १५ वर्षीय विजय बमजनले ज्यान गुमाए। डोल्पाको ठुलीभेरी नगरपालिका-२ मा एस्काभेटर पल्टिँदा चालक ४२ वर्षीय मनवीर रोकायको मृत्यु भयो भने बर्दियाको बढैयाताल-३ मा कारको ठक्करबाट मोटरसाइकल चालक ५५ वर्षीय गणेशप्रसाद पाण्डेको मृत्यु भयो। यस्तै सुनसरीको गढी-४ मा बसको ठक्करबाट ७५ वर्षीया गुद्री देवी मेहताको ज्यान गयो र कञ्चनपुरको पुनर्वास-११ मा बसले किचेर बैतडीका ४० वर्षीय भरतबहादुर चन्दको मृत्यु भयो।
साउन २८ गते काठमाडौँको हल्चोकमा बस र स्कुटर ठोक्किँदा स्कुटर चालक ५९ वर्षीय पुरुषोत्तम महर्जनको मृत्यु भयो। सिराहाको सखुवानन्कारकट्टी-५ मा मोटरसाइकलको ठक्करबाट अन्दाजी ४५ वर्षीय पुरुषको ज्यान गयो भने महोत्तरीको गौशाला-२ मा मोटरसाइकल अनियन्त्रित हुँदा ४० वर्षीय भरत यादवको मृत्यु भयो। नवलपरासी पूर्वको देवचुली-१७ मा बसले स्कुटरलाई ठक्कर दिँदा स्कुटर चालक ३५ वर्षीय हिमलाल लामिछानेको ज्यान गयो।
साउन २९ गते काठमाडौँको कागेश्वरी मनोहरा-४ डाँछीमा माइक्रोको ठक्करबाट ७० वर्षीय शङ्कर प्रसाद कुईकेलको मृत्यु भयो। सर्लाहीको कबिलासी-१० मा मोटरसाइकल दुर्घटना हुँदा २५ वर्षीय रामशंकर माझीको ज्यान गयो। यसैगरी काभ्रेपलाञ्चोकको पाँचखाल-४ र बनेपा-७ मा भएका छुट्टाछुट्टै स्कुटर तथा बस दुर्घटनामा परी ४० वर्षीय रवि सिमखडा र ६९ वर्षीय देवेन्द्रबहादुर खत्रीको मृत्यु भयो।
साउन ३० गते दाङको तुलसीपुर-६ मा दुईवटा मोटरसाइकल आपसमा ठोक्किँदा ३३ वर्षीय कमलेश चौधरीको मृत्यु भयो। नुवाकोटको शिवपुरी-७ थानाभन्ज्याङमा रोकी राखेको बस अचानक गुडी भ्यानसहित भिरमा खस्दा काभ्रेकी ५४ वर्षीया कृष्णमाया प्रजापती डंगोल र रामेछापकी ६५ वर्षीया उदयमाया खत्रीको ज्यान गयो। अछामको मंगलसेन-५ मा अटो अनियन्त्रित भई दुर्घटना हुँदा ४८ वर्षीय निर्प बोगटीको मृत्यु भयो।
सडक दुर्घटनामा ज्यान गुमाउनेहरूको सङ्ख्या दिनप्रतिदिन बढ्दै गएपछि प्रहरीले चालकहरूलाई तीव्र गति नियन्त्रण गर्न, यातायातका नियमहरू कडाइका साथ पालना गर्न र सवारीसाधनको अवस्था सुधार गर्न गम्भीर आग्रह गरेको छ।
तपाईको प्रतिक्रिया दिनुहोस