देशभर मनसुनी वायुको प्रभाव सक्रिय भएसँगै मौसम थप प्रतिकूल बनेको छ । जल तथा मौसम विज्ञान विभागका अनुसार मनसुनको न्यून चापीय रेखा सरदर स्थानभन्दा केही उत्तरतर्फ (नेपालको तराई भूभाग नजिक) सरेकाले वर्षाको सम्भावना बढेको हो ।

हाल देशभर सामान्यदेखि पूर्ण बदली रही अधिकांश स्थानमा मेघ गर्जन र चट्याङसहित वर्षा भइरहेको छ । विभागले कोशी, बागमती र गण्डकी प्रदेशका हिमाली तथा पहाडी भूभागका केही स्थानमा भारी वर्षाको सम्भावना रहेको जनाएको छ । त्यस्तै, गण्डकी र बागमती प्रदेशका पहाडी क्षेत्रका एक–दुई स्थानमा 'धेरै भारी' वर्षाको समेत पूर्वानुमान गरिएको छ ।

त्यसैगरी मधेश, लुम्बिनी र सुदूरपश्चिम प्रदेशका तराई भूभागमा पनि हल्कादेखि मध्यम वर्षाको सम्भावना छ । रातिको समयमा समेत देशभर बदली रही उच्च हिमाली भेगमा हिमपातको समेत सम्भावना रहेको छ ।

भारी वर्षाका कारण गेग्रान बहाव, बाढी, पहिरो र भूक्षयको जोखिम उच्च रहेकाले तटीय क्षेत्र तथा पहाडी भेगका बासिन्दालाई उच्च सतर्कता अपनाउन विभागले अनुरोध गरेको छ । प्रतिकूल मौसमले दैनिक जनजीवन, सडक र हवाई यातायातका साथै कृषि, पर्यटन तथा पर्वतारोहण क्षेत्र प्रभावित हुन सक्ने भएकाले नियमित रूपमा मौसम पूर्वानुमान अपडेट रहन आग्रह गरिएको छ ।