माओवादी केन्द्रद्वारा बाढीपहिरो पीडितका लागि केन्द्रीय राहत कोष स्थापना
अभियानलाई थप व्यवस्थित र प्रभावकारी बनाउन माओवादी केन्द्रको केन्द्रीय कार्यालयमा विपद् व्यवस्थापन विभागले ‘हेल्प डेस्क’ स्थापना गरेको छ, जसले विपद्को अवस्थाबारे दैनिक अद्यावधिक जानकारी दिनेछ।
नेपाल कम्युनिष्ट पार्टी (माओवादी केन्द्र)ले बाढी, पहिरो र डुबानबाट प्रभावित नागरिकहरूलाई सहयोग पुर्याउन केन्द्रीय राहत कोष स्थापना गरेको छ। पार्टीले ग्लोबल आइएमई बैङ्कको कोटेश्वर शाखामा ३६०१०१०००००४५ नम्बरको खातामा रकम जम्मा गर्न सकिने व्यवस्था गर्दै राहत कोष खडा गरेको हो।
पार्टीको पदाधिकारी बैठकले गरेको निर्णय अनुसार यो राहत कोषमा संघीय संसद्का सदस्य र प्रदेशसभा सदस्यहरूले दश दिनको पारिश्रमिक जम्मा गर्नेछन्। साथै, स्थानीय तहका जनप्रतिनिधिहरूलाई स्वैच्छिक सहयोग गर्न पनि पार्टीले परिपत्र गरिसकेको छ।
राहत रकम सङ्कलनको लागि पार्टीको अपिल
माओवादी केन्द्रका प्रदेश समितिहरूले पनि राहत रकम सङ्कलन गरी केन्द्रीय राहत कोषमा जम्मा गर्ने व्यवस्था मिलाइएको छ। पार्टी कार्यालयका सचिव डोरप्रसाद उपाध्यायका अनुसार सबै तहका कमिटीहरूलाई राहत सङ्कलनमा सक्रिय रूपमा सहभागी हुन परिपत्र गरिएको छ। यस अभियानलाई थप व्यवस्थित र प्रभावकारी बनाउन माओवादी केन्द्रको केन्द्रीय कार्यालयमा विपद् व्यवस्थापन विभागले ‘हेल्प डेस्क’ स्थापना गरेको छ, जसले विपद्को अवस्थाबारे दैनिक अद्यावधिक जानकारी दिनेछ ।
माओवादी केन्द्रले यो राहत कोषमार्फत बाढीपहिरोबाट पीडित जनतालाई तत्काल सहायता पुर्याउन सहयोगी हातहरू जुटाउन आह्वान गरेको छ।
तपाईको प्रतिक्रिया दिनुहोस