जुम्लामा पछिल्लो समय नयाँ उद्योग दर्ता गर्नेहरूको सङ्ख्या घट्दै गएको छ भने व्यवसाय खारेज गर्नेहरूको क्रम बढ्दै गएको छ। उद्योग तथा उपभोक्ता हित संरक्षण कार्यालयका प्रमुख टंकप्रसाद न्यौपानेका अनुसार विगत चार वर्षदेखि लगातार उद्योग दर्तामा कमी र खारेजीमा वृद्धि हुँदै आएको छ।

कार्यालयको तथ्याङ्कअनुसार आर्थिक वर्ष २०८२/८३ मा १८० वटा उद्योग खारेज भएका छन् भने सोही अवधिमा १८८ वटा उद्योग दर्ता र ३३४ वटा नवीकरण भएका छन्। सोही आवमा वाणिज्यतर्फ ६१ वटा उद्योग दर्ता, ५८ वटा नवीकरण र ५२ वटा खारेज भएका छन्। विभिन्न शीर्षकअन्तर्गत उक्त आवमा करिब १६ लाख २५ हजार रुपैयाँ राजस्व सङ्कलन भएको प्रमुख न्यौपानेले जानकारी दिए।

चालु आर्थिक वर्षको स्थिति (भदौसम्म):
नयाँ उद्योग दर्ता: ४३ वटा
उद्योग नवीकरण: ११९ वटा
उद्योग खारेजी: ५ वटा
वाणिज्य उद्योग दर्ता: ११ वटा

कार्यालयमा दर्ता भएका उद्योगहरूमा उत्पादनमूलक, कृषि तथा वनजन्य, सेवामूलक, पर्यटन, निर्माण र सूचना सञ्चार प्रविधिसँग सम्बन्धित उद्योगहरू रहेका छन्। आर्थिक मन्दी तथा अन्य विभिन्न कारणले व्यवसायीहरू पलायन हुने क्रम बढेका कारण जिल्लामा उद्योग खारेजीको दर उकालो लागेको देखिएको छ।