धेरै चिया पिउनु स्वास्थ्यका लागि हानिकारक मानिने गरेकै कारण पछिल्लो समय धेरै मानिस यसको सेवनबाट टाढा रहन थालेका छन्। तर, हालै चीनमा गरिएको एक बृहत् अध्ययनले नियमित चिया पिउने मानिसमा मुटु तथा रक्तनलीसम्बन्धी रोगको जोखिम उल्लेख्य रूपमा कम हुने नयाँ तथ्य सार्वजनिक गरेको छ। 

प्रसिद्ध ‘जर्नल अफ इन्टरनल मेडिसिन’मा प्रकाशित उक्त अनुसन्धान अनुसार चियामा पाइने शक्तिशाली वनस्पतिजन्य यौगिकले मुटु, मस्तिष्क र रक्तनलीको स्वास्थ्यमा सकारात्मक प्रभाव पार्छ।

चीनका ४ लाख ९५ हजार ९ सयभन्दा बढी मानिसमा औसत नौ वर्षसम्म गरिएको अध्ययन अनुसार, दैनिक ६ देखि ८ कपसम्म चिया पिउने समूहमा मुटुरोग, मस्तिष्कका रक्तनली र हातखुट्टाका रक्तनलीसम्बन्धी समस्याको जोखिम चिया नपिउनेको तुलनामा करिब ११ प्रतिशत कम देखिएको छ। 

वैज्ञानिकहरूका अनुसार चियामा प्रचुर मात्रामा पाइने ‘पोलिफिनोल’ नामक एन्टिअक्सिडेन्टले शरीर सुन्निने समस्या कम गर्न र रक्तनलीको कार्यक्षमता सुधार्न मद्दत पुर्‍याउँछ। यसका साथै, चियामा पाइने ‘एल-थियानाइन’ नामक एमिनो एसिडले रोग प्रतिरोधात्मक क्षमता बढाउने र हड्डीको घनत्व जोगाउनसमेत सहयोग पुर्‍याउने विभिन्न अन्तर्राष्ट्रिय अध्ययनहरूले पुष्टि गरेका छन्।

यद्यपि, चियाको सेवन र मुटुको स्वास्थ्यबीच सकारात्मक सम्बन्ध देखिए पनि चियाकै कारण मात्र रोगको जोखिम घटेको भन्ने पूर्ण वैज्ञानिक पुष्टि भने नभएको अनुसन्धानकर्ताहरूको भनाइ छ। अध्ययनमा चिया पिउने, धूमपान नगर्ने र शारीरिक रूपमा सक्रिय रहने मानिसहरूमा मात्र रक्तनलीसम्बन्धी रोगको जोखिम सबैभन्दा कम पाइएको थियो। 

विज्ञहरूका अनुसार मुटु र समग्र शरीरलाई स्वस्थ राख्न केवल चियामा मात्र निर्भर हुनुभन्दा सन्तुलित आहार, नियमित व्यायाम र धूमपानरहित स्वस्थ जीवनशैली अपनाउनु नै सबैभन्दा उत्तम उपाय हो।