विश्वप्रसिद्ध नेपाली पर्वतारोही निर्मल पुर्जाको नेतृत्वमा रहेको १० सदस्यीय अन्तर्राष्ट्रिय पर्वतारोहण टोली पाकिस्तानस्थित ८,०४७ मिटर अग्लो ‘ब्रोड पिक’ हिमालमा सम्पर्कविहीन भएको छ । काराकोरम पर्वतशृङ्खलाअन्तर्गत पर्ने उक्त हिमालमा बिहीबार दिउँसो हिमपहिरो गएपछि टोलीसँगको सम्पर्क टुटेको हो ।

पाकिस्तानी पर्वतारोहण अधिकारीहरूका अनुसार हिमपहिरो गएपछि आरोही टोली बेपत्ता भएको छ । टोलीमा निर्मल पुर्सासहित पाँच नेपाली, एक अमेरिकी, एक चिनियाँ र एक ओमानी नागरिक गरी १० जना आरोही रहेका छन् । विश्वको १२औँ अग्लो र चुनौतीपूर्ण मानिने ब्रोड पिक आरोहणका क्रममा यो दुःखद घटना घटेको हो ।

पाकिस्तानको अल्पाइन क्लबले सरकारी निकायसँग निरन्तर समन्वय गर्दै तत्काल खोज तथा उद्धार अभियान अघि बढाइएको जनाएको छ । क्लबले उपलब्ध सबै स्रोतसाधन परिचालन गर्ने प्रतिबद्धता व्यक्त गरेको छ । मौसम अनुकूल हुनेबित्तिकै हेलिकोप्टरमार्फत उद्धार कार्य तीव्र पारिने बीबीसीले जनाएको छ ।

निर्मल पुर्जाले सन् २०१९ मा विश्वका ८,००० मिटरभन्दा अग्ला सबै १४ वटा हिमाल करिब ६ महिनाको छोटो अवधिमा आरोहण गरेर विश्व कीर्तिमान कायम गरेका थिए । ब्रिटिस सेनाको पूर्व रोयल मरीनसमेत रहेका पुर्जाको नेतृत्वमा रहेको टोली बेपत्ता भएपछि अन्तर्राष्ट्रिय पर्वतारोहण समुदायले चिन्ता व्यक्त गरेको छ ।

अल्पाइन क्लबले जारी गरेको विज्ञप्तिमा भनिएको छ, “हामी सबै आरोहीको सुरक्षा र सफल उद्धारका लागि प्रार्थना गर्दछौँ । यस कठिन समयमा आरोहीका परिवार र अन्तर्राष्ट्रिय पर्वतारोहण समुदायप्रति हामी पूर्ण ऐक्यबद्धता व्यक्त गर्दछौँ ।”