साउदी अरबको दक्षिणपूर्वी क्षेत्रमा रहेको तेल क्षेत्रलाई लक्षित गरी गरिएको ड्रोन आक्रमणको अवशेष खस्दा एक नेपालीसहित दुई जनाको मृत्यु भएको छ भने अन्य दुई जना घाइते भएका छन्। साउदी सुरक्षा निकायले हुथी विद्रोहीले पठाएको ड्रोनलाई हावामै विफल पारी खसाले पनि त्यसको अवशेष कामदार रहेको क्षेत्रमा खस्न पुग्दा उक्त ठूलो क्षति भएको हो।

साउदी अरबको ऊर्जा मन्त्रालयले बुधबार सार्वजनिक गरेको विज्ञप्ति अनुसार सरकारी तेल कम्पनी 'साउदी अराम्को'द्वारा सञ्चालित शैबह तेल क्षेत्रमा सो घटना भएको हो। ड्रोनको अवशेष खस्ने क्रममा त्यहाँ कार्यरत ठेकेदार कम्पनीको एउटा सवारीसाधनमा आगलागी भएको थियो। मन्त्रालयका अनुसार घटनामा ज्यान गुमाउनेमा एक नेपाली र एक फिलिपिन्सका नागरिक रहेका छन् भने घाइते हुनेहरूमा पाकिस्तानी र भारतीय नागरिक छन्।

यमनमा सक्रिय इरानसमर्थित हुथी विद्रोहीहरूले पछिल्लो समय साउदी अरबका रणनीतिक पूर्वाधार, सर्वसाधारण प्रयोग गर्ने विमानस्थल र इन्धन भण्डारण तथा प्रशोधन केन्द्रहरूलाई लक्षित गरी निरन्तर ड्रोन तथा क्षेप्यास्त्र आक्रमण गर्दै आएका छन्। यस घटनाले वैदेशिक रोजगारीका लागि खाडी मुलुक पुगेका नेपाली कामदारको सुरक्षा चुनौतीबारे पुनः गम्भीर प्रश्न खडा गरेको छ।