भारतको ओडिसा राज्यस्थित भुवनेश्वरमा रहेको प्रतिष्ठित कलिंगा इन्स्टिच्युट अफ इन्डस्ट्रियल टेक्नोलोजी (केआईआईटी) विश्वविद्यालयको होस्टेलमा एक नेपाली छात्रा मृत अवस्थामा फेला परेकी छन् ।

बिहीबार साँझ भुवनेश्वरको पटिया क्षेत्रमा रहेको केआईआईटी विश्वविद्यालयको ‘क्वी सी ४’ नामक छात्रावासमा बीटेक कम्प्युटर साइन्स (सीएसई) पहिलो वर्षमा अध्ययनरत छात्रा प्रिशा साह मृत अवस्थामा भेटिएकी हुन् । विश्वविद्यालयमा अध्ययनरत नेपाली विद्यार्थीहरूले उनको परिचय पुष्टि गरेका छन् । उनी वीरगन्जकी हुन् र बी-३४ सेक्सनमा पढ्दै आएकी थिइन् ।

ओडिसा पुलिस कमिसनर एस. देव दत्त सिंहले नेपाली छात्रा मृत फेला परेको पुष्टि गर्दै घटनाको बारेमा प्रारम्भिक जानकारी दिएका छन् । उनले भने, “एक जना नेपाली छात्राको मृत्यु भएको खबर हामीलाई प्राप्त भएको छ । दूतावासमार्फत उनका अभिभावकलाई सूचित गरिएको छ ।”

उनका अनुसार घटनाको कारण हालसम्म खुल्न सकेको छैन भने प्रहरीले थप अनुसन्धान जारी राखेको छ । “अहिले हामी मृतककी परिवारको प्रतीक्षा गरिरहेका छौँ । उनीहरू भोलिसम्म आइपुग्ने जानकारी दूतावासबाट प्राप्त भएको छ,” सिंहले जानकारी दिए ।

यही होस्टेलमा यसअघि पनि यस्तै दुखद घटना घटेको थियो । गत २०८१ साल फागुन ५ गते नेपाली छात्रा प्रकृति लम्साल त्यही 'क्वी सी ४' होस्टेलमा मृत फेला परेकी थिइन् ।