अन्तर्राष्ट्रिय नेपाली साहित्य समाज (अनेसास) क्यानबेरा च्याप्टरको आयोजनामा तथा नेपाली कला, संस्कृति तथा साहित्य प्रतिष्ठान क्यानबेराको सह–आयोजनामा आदिकवि भानुभक्त आचार्यको २१२औं जन्मजयन्तीको अवसरमा विशेष साहित्यिक साँझ भव्य रूपमा सम्पन्न भएको छ ।

क्यानबेरास्थित The Chimney Restaurant, Gungahlin मा आयोजित उक्त कार्यक्रम साँझ ५:३० बजे सुरु भई ९:३० बजेसम्म सञ्चालन भएको थियो । कार्यक्रममा करिब २० जना नेपाली साहित्यप्रेमीहरूले कविता, गीति प्रस्तुति, रचना वाचन तथा आफ्ना सिर्जनात्मक अभिव्यक्तिहरू मार्फत नेपाली भाषा, प्रवासी अनुभव, संस्कृतिप्रतिको माया र समसामयिक संवेदनालाई उजागर गरेका थिए ।

कार्यक्रमको प्रमुख अतिथिका रूपमा अष्ट्रेलियास्थित नेपाली राजदूतावासकी महामहिम राजदूत चित्रलेखा यादवको उपस्थिति रहेको थियो । अनेसास क्यानबेराकी उपाध्यक्ष महत्ता घिमिरे चापागाईंले कार्यक्रमको सभापतित्व गरेकी थिइन् ।

कार्यक्रममा सिड्नीबाट आएका अतिथि कवि–लेखक जितेन्द्र मल्ल, सुरेन्द्र दवाडी र राहुल अर्यालले समेत आफ्ना रचनाहरू प्रस्तुत गरेका थिए । विशेष गरी नयाँ पुस्ताबाट मानस्वी चापागाईंको प्रस्तुति दर्शकको मन छुने खालको रहेको थियो । उनले आफ्ना हजुरबुवा, कवि भवानी घिमिरेको कविता वाचन गरेर साहित्यमा पुस्तान्तरको सन्देश दिनुका साथै भावनात्मक वातावरण सिर्जना गरेकी थिइन् ।

सो अवसरमा अनेसास क्यानबेरा च्याप्टरको नयाँ ११ सदस्यीय कार्यसमितिको पनि घोषणा भएको छ । संस्थापक अध्यक्ष सकुन्तला देवकोटाले समितिको घोषणा गर्दै महत्ता घिमिरे चापागाईंको अध्यक्षतामा समिति सर्वसम्मत चयन भएको जानकारी दिइन् । अध्यक्ष घिमिरेले नयाँ कार्यकालमा सबैको सुझाव र भावनालाई सम्मान गर्दै संस्थालाई अझ सशक्त र सक्रिय बनाउने प्रतिबद्धता जनाइन् ।

साहित्यिक साँझमा भानुभक्त आचार्यका रामायण श्लोक, समसामयिक कविता, प्रवासी जीवनका अनुभूतिहरू, तथा सांगीतिक प्रस्तुतीमार्फत नेपाली साहित्यिक चेतनाको भावपूर्ण प्रवाह देखिएको थियो ।