काठमाडौं महानगरपालिकाको महानगर प्रहरी प्रमुखबाट निलम्बनमा परेका राजुनाथ पाण्डेले उक्त निर्णयविरुद्ध उच्च अदालत पाटनमा रिट दायर गरेका छन् ।

पाण्डेले आफूलाई अन्यायपूर्ण रूपमा निलम्बन गरिएको दाबी गर्दै जेठ २५ गते उच्च अदालत पाटनमा रिट दायर गरेका हुन्। सो रिटमा अदालतले प्रारम्भिक सुनुवाइका लागि आज दुबै पक्षलाई बोलाएको छ । अदालतले जेठ २७ गते नै अन्तरिम आदेश जारी गर्ने वा नगर्ने भन्नेबारे छलफलका लागि सम्बन्धित पक्षहरूलाई उपस्थित हुन आग्रह गरेको हो ।

रिटमा पाण्डेले काठमाडौं महानगरपालिकाका प्रमुख बालेन शाह, उपप्रमुख सुनिता डंगोल, प्रशासकीय अधिकृत सरोज गुरागाईं, महानगर प्रहरी बलका निमित्त प्रमुख विष्णु जोशी र नगर कार्यपालिका कार्यालयलाई विपक्षी बनाएका छन् ।

महानगरपालिकाका प्रशासकीय अधिकृत गुरागाईंले जेठ २० गते पाण्डेलाई ६ महिनाका लागि निलम्बन गर्ने निर्णय गरेका थिए । उक्त निर्णयको केही दिनअघि अर्थात् चैत २१ गते गुरागाईं कार्यालय पुगेका बेला पाण्डेले हुलहुज्जत गरेको भन्दै जेठ ६ गते स्पष्टीकरण समेत सोधिएको थियो ।