इमेज बचत तथा ऋण सहकारी संस्था ठगी अभियोगमा मुछिएका बागलुङको ढोरपाटन नगरपालिका प्रमुख (मेयर) देवकुमार नेपालीलाई जिल्ला अदालत कास्कीले पुर्पक्षका लागि कारागार चलान गर्ने आदेश दिएको छ ।

सोमबार न्यायाधीश हिमलाल बेलबासेको इजलासले उनलाई बागलुङ कारागारमै थुनामा राख्ने आदेश दिएको हो । नेपालीलाई आइतबार बयानका लागि पोखरा झिकाइएको थियो ।

जिल्ला सरकारी वकिलको कार्यालय कास्कीका अनुसार पोखरास्थित इमेज सहकारीमा मात्र नेपालीले ५७ करोड ३५ लाख ८४ हजार रुपैयाँ हिनामिना गरेको आरोप छ । उनी इमेज सहकारी ठगी मुद्दामा १५ जना अभियुक्तमध्ये एक हुन् ।

देवकुमार नेपालीले बागलुङ र पोखरामा इमेज सहकारीका नाममा दुई वटा संस्था सञ्चालन गर्दै आएका थिए । यसअघि उनी सुर्यदर्शन बचत तथा ऋण सहकारीका उपाध्यक्षसमेत थिए । त्यहाँबाट पनि ७७ लाख ५० हजार रुपैयाँ अनधिकृत रुपमा निकालेको भन्दै सरकारी वकिलको कार्यालयले अर्काे मुद्दा अघि सारेको छ ।

सुर्यदर्शन सहकारी ठगी अभियोगमा भने गत बिहीबार जिल्ला अदालतले उनलाई २० लाख रुपैयाँ धरौटीमा रिहा गर्न आदेश दिए पनि नेपालीले अहिलेसम्म धरौटी रकम बुझाएका छैनन् ।

सर्वसाधारणको बचत फिर्ता नदिएपछि नेपाली १६ महिना फरार भएका थिए । उनलाई नेपाल प्रहरीको केन्द्रीय अनुसन्धान ब्युरो (CIB) ले २०८१ असोज ११ गते भारतको दिल्लीबाट पक्राउ गरेर नेपाल ल्याएको थियो ।

दिल्लीबाट ल्याएपछि उनलाई बागलुङ अदालतको आदेशमा कारागार चलान गरिएको थियो । कास्की अदालतको पछिल्लो आदेशअनुसार उनी हाल बागलुङ कारागारमै रहनेछन् ।