धनुषा जिल्लामा बिग्रँदै गएको सुरक्षा स्थितिलाई मध्यनजर गर्दै स्थानीय प्रशासनले अनिश्चितकालीन कर्फ्यु (निषेधाज्ञा) जारी गरेको छ। जिल्ला प्रशासन कार्यालय, धनुषाले आज (साउन १४ गते) दिउँसो ३:३० बजेदेखि अर्को आदेश नभएसम्मका लागि कर्फ्यु लागू गरेको हो।

शान्ति सुरक्षा कायम गर्न प्रशासनले स्थानीय प्रशासन ऐन, २०२८ को दफा ६ को उपदफा १ (क) र २ बमोजिम नेपाली सेना परिचालनका लागि विष्णुदल गणलाई पत्राचार गरेको छ। सामाजिक सञ्जालमा सार्वजनिक भएको पत्रमा प्रमुख जिल्ला अधिकारी प्रेमप्रसाद लुइटेलले सुरक्षा स्थिति नियन्त्रणमा राख्न आवश्यकताअनुसार नेपाली सेनालाई ‘न्यूनतम सैनिक शक्तिको प्रयोग गर्दै गोली हान्नेसम्मको अधिकार’ प्रत्यायोजन गरिएको उल्लेख छ।

पत्रको बोधार्थ गृह मन्त्रालयलाई समेत दिइएको छ। यद्यपि, पत्रको प्रामाणिकता र विषयवस्तुबारे जिज्ञासा राख्दा प्रजिअ लुइटेलले आफूले कर्फ्यु जारी गरेको स्वीकार गरे पनि सामाजिक सञ्जालमा सार्वजनिक भएको पत्रको विषयमा स्पष्ट प्रतिक्रिया दिन चाहेनन्। उनले पत्र अध्ययन गरेपछि मात्रै बोल्न सकिने बताएका छन्।

पछिल्लो समय धनुषामा साम्प्रदायिक वा सामाजिक तनावका कारण सुरक्षा चुनौती बढेको देखिएको छ। स्थानीय प्रशासनले स्थिति थप भयावह हुन नदिन र जनधनको क्षति रोक्न सुरक्षाका कडा उपायहरू अपनाएको स्रोतले जनाएको छ। हाल जिल्लाका मुख्य बजार र संवेदनशील क्षेत्रहरूमा सुरक्षा व्यवस्था कडा पारिएको छ।