यस वर्ष बक्स अफिसमा फिल्महरूको अभूतपूर्व सफलता देखिएको छ। लगातार हिट चलचित्रहरूले निर्माताहरूलाई ठूलो नाफा दिलाइरहेका छन्। यस्तै माहोलमा आउँदो अगस्त १४ मा दुई ठूला फिल्म एकैदिन प्रदर्शन हुँदैछन्—ऋतिक रोशन र जुनियर एनटीआरको एक्सन–थ्रिलर वार २ र साउथ सुपरस्टार रजनीकान्तको बहुप्रतिक्षित फिल्म कुली।

रजनीकान्त अभिनीत कुलीले रिलिजअघि मात्र अग्रिम बुकिङबाट करिब २० करोड भारु उठाइसकेको छ। लोकेश कनागराज निर्देशित यस फिल्मको विशेषता भनेको रजनीकान्त र आमिर खानको पहिलो सहअभिनय हो। विदेशी बजारमा पनि यसको अग्रिम बुकिङ तीव्र गतिमा भइरहेको छ।

रिपोर्ट अनुसार, करिब ३७५ करोड भारु बजेटमा बनेको कुलीमा रजनीकान्तलाई १५० करोड पारिश्रमिक दिइएको छ। उनी ‘देवा’ नामक पात्रमा देखिने छन् भने नागार्जुनले ३० करोड पारिश्रमिकमा महत्त्वपूर्ण भूमिका निभाएका छन्। आमिर खान भने मित्रताको कारण यो परियोजनामा निःशुल्क सहभागी भएका बताइएको छ। फिल्ममा श्रुति हसनको पनि उपस्थिति रहनेछ।

अग्रिम कमाइ र क्रेजका आधारमा कुलीले वार २लाई कडा टक्कर दिने सम्भावना देखिएको छ। तर वार २ पनि ठूलो स्तरमा रिलिज हुँदैछ। यसको तमिल भर्सन मात्र ९० करोड भारुमा बिक्री भइसकेको छ, जसले निर्माण पक्षलाई पहिले नै राम्रो नाफा दिलाइसकेको छ।