खेलकुदमन्त्री तेजुलाल चौधरीले कर्णालीमा हुने १०औं राष्ट्रिय खेलकुद प्रतियोगिता निर्धारित समयमै सम्पन्न हुने बताएका छन्। शनिबार काठमाडौंमा रिपोर्टर्स क्लब नेपालले आयोजना गरेको अन्तरक्रिया कार्यक्रममा उनले प्रतियोगिता आगामी मंसिर २ देखि ९ सम्म सुर्खेतमा हुने जानकारी दिए। 

सरकारले राष्ट्रिय खेलकुदका लागि ६० करोड रुपैयाँ बजेट छुट्याएको र रङ्गशालाको भौतिक पूर्वाधारको काम दशैं अगाडि सम्पन्न हुने जनाए। उनले बजेटको कमीका कारण खेलकुद क्षेत्रमा अपेक्षित काम गर्न नसकिएको गुनासो गरे। 

वर्तमान सरकारको पहिलो निर्णय अनुसार कीर्तिपुर रङ्गशाला ३ सय दिनमा तयार गर्ने लक्ष्य राखिएको छ, जसका लागि २० करोड रुपैयाँ छुट्याइएको छ। यो काम ३ सय दिनमा पूरा गर्न असम्भव देखिएपछि खेलकुद मन्त्रालय र खेलकुद परिषद्ले सहरी विकास मन्त्रालयलाई जिम्मा दिएको बताए।