काठमाडौं । नेपाल विद्यार्थी संगठन (नेविसंघ)को असन्तुष्ट समूहले त्रिचन्द्र बहुमुखी क्याम्पसमा तालाबन्दी गरेको छ । 

स्वतन्त्र विद्यार्थी युनियन (स्ववियु)को निर्वाचनका आकांक्षी नेविसंघको असन्तुष्ट समूहले तालाबन्दी गरेको हो । 

सोही समूहका केही विद्यार्थीहरूले आफ्नो संगठनबाट टिकट नपाएपछि स्वतन्त्र उमेदवारी दिएका थिए । 

क्याम्पसको मूल गेटमै उक्त समूहले तालाबन्दी गरेपछि क्याम्पसको कर्मचारी प्रशासनको कार्यसम्पादन प्रभावित बनेको छ । 

तालासँगै टाँसिएको पर्चामा भनिएको छ, ‘हाम्रो जायज माग पूरा नभएसम्म क्याम्पस प्रमुख र निर्वाचन समितिका पदाधिकारीहरूलाई क्याम्पस प्रवेश निषेध गरिएको छ ।’

पर्चामा सभापति पदका उम्मेदवार विवेक बानियाँ र श्रीधर श्रेष्ठले हस्ताक्षर छन् । 

त्रिचन्द्र बहुमुखी क्याम्पसको स्ववियु निर्वाचनको उमेवारी दर्ताको क्रममा यी दुवैले आफ्नो उमेदवारी दर्ता गराएका थिए । 

तर, निर्वाचन समितिले गोविन्द कोइरालालाई आधिकारिक उमेदवार घोषणा गरेपछि उनीहरूले तालाबन्दी गरेका हुन् । 

नेविसंघको आन्तरिक विवादका कारण निर्वाचनको मुखैमा क्याम्पस बन्दी हुनुहँदैन भन्दै अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु)ले विरोध गरेको छ ।  

नेविसंघ नेपाली कांग्रेस र अनेरास्ववियु नेकपा (एमाले) निकट विद्यार्थी संगठन हुन् ।