Techie IT
२०८३ मंसिर २, मंगलबार

हसिनाको गृहजिल्ला गोपालगञ्जमा प्रतिबन्धित अवामी लिगको उग्र प्रदर्शन


बंगलादेशको प्रतिबन्धित राजनीतिक दल अवामी लिगका सयौँ कार्यकर्ताले आइतबार पूर्वप्रधानमन्त्री शेख हसिनाको गृहजिल्ला गोपालगञ्जमा उग्र प्रदर्शन गरेका छन् । स्थानीय सञ्चारमाध्यमहरूका अनुसार प्रदर्शनका क्रममा प्रहरीको अवरोध तोड्दै कार्यकर्ताहरूले सार्वजनिक संरचना, स्मारक र सुरक्षाकर्मीका सवारीसाधनमा तोडफोड गरेका छन् ।

बिहान ११ बजेदेखि दिउँसो पौने २ बजेसम्म चलेको प्रदर्शनमा जिल्लाका विभिन्न क्षेत्रबाट आएका अवामी लिग, युवा लिग र छात्र लिगका कार्यकर्ता सहभागी थिए । राष्ट्रिय झण्डासहित लाठी, खुकुरी, भाला र बन्चरो बोकेर सडकमा उत्रिएका प्रदर्शनकारीले हसिना र पार्टीको पक्षमा नाराबाजी गर्दै टायर बालेर यातायात अवरुद्ध पारेका थिए । प्रदर्शनमा महिला कार्यकर्ताको समेत उल्लेख्य उपस्थिति थियो ।

बन्द कार्यालय कब्जा र नामपट्टी परिवर्तन
लन्च घाट, वुमेन्स कलेज र शिल्पकला एकेडेमी हुँदै अघि बढेको जुलुस बैंकपारास्थित अवामी लिगको जिल्ला कार्यालयमा प्रवेश गरेको थियो । प्रदर्शनकारीले लामो समयदेखि बन्द रहेको उक्त कार्यालयको ताला खोलेर उत्सव मनाएका थिए ।

त्यसक्रममा लन्च घाटनजिक रहेको ‘जुलाई स्मारक’ मा तोडफोड गरिएको स्थानीय सञ्चारमाध्यमले जनाएका छन् । प्रदर्शनकारीले गोपालगञ्ज विज्ञान तथा प्रविधि विश्वविद्यालयस्थित ‘हादी स्क्वायर’ को नामपट्टी हटाएर पुनः ‘जय बङ्गला चत्तर’ राखेका छन् भने गोपालगञ्ज सरकारी कलेजको प्रवेशद्वारमा ‘गभर्मेन्ट बङ्गबन्धु कलेज’ लेखिएको ब्यानर टाँगेका छन् ।

प्रदर्शनकारीले एक सुपरमार्केट र प्रहरी बिटका सिसा फुटाउनुका साथै प्रहरीको बख्तरबन्द गाडीमा चढेर पछाडिको ऐना फुटाएका थिए । उनीहरूले उक्त गाडीमा रातो रङ पोतेर ‘जय बङ्गला, जय बङ्गबन्धु’ समेत लेखेका छन् ।

प्रदर्शनलाई मध्यनजर गर्दै गोपालगञ्जका संवेदनशील क्षेत्रमा प्रहरी, सीमा सुरक्षा बल (बीजीबी), विशेष प्रतिक्रिया बटालियन र सशस्त्र प्रहरी ठूलो सङ्ख्यामा परिचालन गरिएको थियो । बंगलादेशको गृह मन्त्रालयका एक वरिष्ठ अधिकारीका अनुसार सरकारले घटनालाई नजिकबाट निगरानी गरिरहेको छ । तत्काल बल प्रयोग गर्दा मानवीय क्षति हुन सक्ने भएकाले सुरक्षाकर्मीले संयमता अपनाएको ती अधिकारीले बताएका छन् । घटनापछि स्थिति नियन्त्रणमा राख्न गोपालगञ्जमा बीजीबीका थप छ प्लाटुन सुरक्षाकर्मी परिचालन गरिएको छ ।

देशव्यापी बन्द र हसिना फर्काउने घोषणा
सन् २०२४ को जुलाईमा भएको जनविद्रोहपछि सत्ताच्युत भएकी हसिना अगस्टदेखि भारतमा निर्वासनमा छिन् । गोपालगञ्ज हसिनाको गृहजिल्ला भएकाले यसलाई अवामी लिगको बलियो पकड क्षेत्र मानिन्छ ।

अवामी लिगले नोभेम्बर १४ देखि १९ सम्म देशव्यापी विरोध कार्यक्रम घोषणा गरेको छ, जसमा नोभेम्बर १७ लाई ‘कालो दिवस’ का रूपमा मनाउने र नोभेम्बर १९ मा देशव्यापी बन्द गर्ने उल्लेख छ । पार्टीका संगठन सचिव एसएम कमल हुसेनले हसिना आगामी डिसेम्बरमा बंगलादेश फर्किने दाबी गर्दै त्यसकै तयारीस्वरूप देशव्यापी आन्दोलन थालिएको बताएका छन् । त्यस्तै, गोपालगञ्ज जिल्ला अवामी लिगका कार्यालय सचिव इलियास हकले हसिनालाई स्वदेश नफर्काएसम्म सडक आन्दोलन नरोकिने चेतावनी दिएका छन् ।



तपाईको प्रतिक्रिया दिनुहोस



Techie IT
प्रीतिबाट युनिकोड

© Preeti to Unicode
रोमनाइज्ड नेपाली

© Nepali Unicode
ताजा अपडेट