नेकपा माओवादी केन्द्रका उपमहासचिव जनार्दन शर्माले माओवादी नेताहरूको सम्पत्तिको छानबिन गर्न स्वतन्त्र व्यक्तिलाई जिम्मा दिनुपर्ने प्रस्ताव राखेका छन् । मंगलबार काठमाडौंमा आयोजित एक कार्यक्रममा बोल्दै शर्माले पार्टीभित्र पारदर्शिता कायम गर्न आवश्यक रहेको बताए ।

उनले भने, “मैले पार्टीमा नेताहरूको सम्पत्ति छानबिन गरी पारदर्शी बनौं, र पार्टीले होइन, स्वतन्त्र व्यक्तिलाई छानबिनको जिम्मा दिऔं भनेको छु । बाहिर सुशासनका कुरा गर्ने हामी आफैँ अपारदर्शी भएर हुँदैन।”

शर्माले पूर्वप्रधानमन्त्री मनमोहन अधिकारीबाहेकका अधिकांश कम्युनिस्ट नेताहरू भ्रष्टाचारमा मुछिएको आरोप पनि लगाए । उनले रातारात अर्बपति बन्ने प्रवृत्ति र राज्यदोहनलाई कम्युनिस्ट नेताहरूको चरित्रका रूपमा चित्रण गरे ।

पार्टी नेतृत्वप्रति पनि उनले तीव्र असन्तुष्टि व्यक्त गरेका थिए । उनले नेतृत्व सामन्ती र निरंकुश बन्दै गएको आरोप लगाउँदै भने, “पार्टीभित्र जयजयकार गर्ने, सलामी दिने प्रवृत्तिले नेतृत्वलाई अझै बढी घमण्डी बनाएको छ ।” कार्यकर्ताहरू नेताहरूको आलोचना गर्न नसक्ने अवस्था आएको र नेतृत्व पनि आफूलाई घेरिरहेका प्रशंसकहरूमै रमाउन थालेको शर्माको भनाइ छ ।

उनले थपे, “हामी अहिले जनताको प्रश्न सुन्न छाडेका छाैँ, जनताले प्रश्न गर्छन्, हामी कान थुनेर बस्छौं ।”

शर्माले कम्युनिस्ट पार्टीमा जनवाद समाप्त भइसकेको र केवल केन्द्रीयता बाँकी रहेको आरोप लगाए । संसदमा समेत सांसदहरूको अभिव्यक्ति स्वतन्त्रता खोसिएको उनको टिप्पणी गरेका थिए । पार्टीको ह्वीप प्रणालीले विचार अभिव्यक्तिमा प्रतिबन्ध लगाएको भन्दै उनले त्यसलाई “जनप्रतिनिधिमाथिको नियन्त्रण” को संज्ञा दिएका छन् ।