नेकपा (माओवादी केन्द्र) का सांसद माधव सापकोटाले भूमि सम्बन्धी केही नेपाल ऐन संशोधन गर्न बनेको विधेयक भूमिहीन दलित र भूमिहीन सुकुम्बासीलाई जग्गा दिने उद्देश्यबाहेक सीमित वर्गको हितमा केन्द्रित रहेको आरोप लगाएका छन् ।

शुक्रबार प्रतिनिधिसभाको बैठकमा बोल्दै सांसद सापकोटाले यो विधेयकले जनताको मूल समस्यालाई सम्बोधन गर्न नसकेको बताए । उनले भने, “भूमि सम्बन्धी अध्यादेश हुँदै विधेयक आउँदासम्म विरोधमा रहेको नेपाली कांग्रेसले अग्रसरता लिएर संशोधन गर्ने भनेता पनि जनताको अपेक्षा र आवश्यकता अनुसार विधेयक संशोधन हुन सकेन ।”

सापकोटाले सत्ता साझेदार दलभित्रका केही सांसदहरूको सक्रियताले मात्र विधेयक संसदीय समितिमा पुगेको स्मरण गर्दै त्यतिबेला प्रगतिशील धारणा समावेश हुने अपेक्षा गरिएको बताएका थिए । तर, अन्ततः जनपक्षीय संशोधन नभई राजनीतिक लाभको सौदाबाजीमा विधेयक फसिएको उनको आरोप थियो ।

उनले भने, “सुरुमा लाग्यो यो विधेयक प्रगतिशील हुन्छ, जनताको पक्षमा पुराना दलले अडान लिन थालेछन्। तर अन्तिममा गएर चिया बगान र अपार्टमेन्टबीचको सौदाबाजीमा सीमित भयो। ‘काले काले मिलेर खाउँ भाले’ भन्नेभन्दा अरु केही भएन।”

सांसद सापकोटाले विधेयकले भूमिहीन दलित र सुकुम्बासीलाई जग्गा दिने आशा हराएको भन्दै यसले निश्चित वर्गको मात्र हित गर्ने बताए। उनले यसले जनताको समग्र हितलाई उपेक्षा गरेको दाबी गरेका छन् ।