सत्तारूढ दल नेकपा (एमाले) का मुख्य सचेतक महेश बर्तौलाले बजारमा उपलब्ध खाद्यवस्तुहरूमा अत्यधिक मात्रामा विषादी र रासायनिक पदार्थ प्रयोग भइरहेकाले यसले जनस्वास्थ्यमा गम्भीर खतरा उत्पन्न गरेको चेतावनी दिएका छन्।

शुक्रबार प्रतिनिधिसभाको बैठकमा बोल्दै उनले मानिसको स्वास्थ्यसँग प्रत्यक्ष सम्बन्ध राख्ने विषयलाई सरकारले बेवास्ता गरेको भन्दै आपत्ति जनाएका हुन् । बर्तौलाले भने, “बजारमा बिक्रीका लागि राखिएका विभिन्न खाद्यवस्तुहरूमा अत्यधिक मात्रामा विषादी र रासायनिक पदार्थको प्रयोग भइरहेको छ। यसले जनस्वास्थ्यमा भयानक असर र चुनौती सिर्जना गरिरहेको छ।”

उनले विषादीको बढ्दो प्रयोगका कारण विभिन्न नसर्ने रोगहरू दिनप्रतिदिन बढ्दै गएको उल्लेख गरेका छन् । “मुटु सम्बन्धी रोग, क्यान्सर, मिर्गौला समस्या, मानसिक रोग तथा प्रजनन स्वास्थ्यसम्बन्धी समस्या बढेको देखिन्छ,” बर्तौलाले बताए।

सांसद बर्तौलाले यस्तो गम्भीर विषयमा सरकारको प्रभावकारी नियमन र नियन्त्रण नहुँदा आम नागरिक असुरक्षित बन्दै गएको टिप्पणी गरे। उनले दोषीहरूलाई कडा कारबाही गर्न र उपभोक्तालाई सुरक्षित र स्वस्थ खाद्यवस्तु उपलब्ध गराउन सरकारले विशेष ध्यान दिनुपर्नेमा जोड दिएका थिए ।