नेकपा एमालेका स्थायी कमिटी सदस्य कर्ण थापाले दर्ता गराएको फरक मत भोलिबाट सुरु हुने विधान अधिवेशनमा प्रस्तुत हुने भएको छ ।

बिहीबार बसेको सचिवालय बैठकका निर्णय सार्वजनिक गर्दै उपमहासचिव प्रदीप ज्ञवालीले यो जानकारी दिएका हुन् । उनका अनुसार, थापाले आजै पार्टी केन्द्रीय कार्यालयमा आफ्नो फरक मत दर्ता गराएका थिए ।

ज्ञवालीले भने, “कर्ण थापाले आज प्रस्तुत गर्नुभएको फरक मतबारे भोलि विधान अधिवेशनमा छलफल हुनेछ ।”

यसअघि पनि एमालेका उपाध्यक्षद्वय सुरेन्द्र पाण्डे र युवराज ज्ञवालीले विधान संशोधनसम्बन्धी विषयमा फरक मत राखेका थिए । तर, बिहीबारको सचिवालय बैठकले ती फरक मतबारे कुनै निर्णय भने गरेको छैन ।