प्रधानमन्त्री नियुक्त भएको तेस्रो दिन सुशीला कार्कीको पहलमा रामेश्वर खनाल र कुलमान घिसिङ मन्त्री बन्न राजी भएका छन्।
रामेश्वर खनाल पूर्व अर्थ सचिव हुन् भने घिसिङ नेपाल विद्युत् प्राधिकरणका पूर्व प्रमुख हुन्। उनीहरू चुनावी सरकारको नेतृत्व लिन इच्छुक देखिएका थिए। प्रारम्भमा कार्कीले दुबैसँग फोनमा छलफल गरेकी थिइन् र सकारात्मक जवाफ पाएपछि उनीहरू सिंहदरबार पुगेका थिए।
खनाल अर्थमन्त्री र घिसिङ उर्जामन्त्री बन्नेछन्। घिसिङ केपी ओली नेतृत्वको सरकारले प्राधिकरणको प्रमुखबाट हटाएपछि राजनीतिमा सक्रिय भएका थिए। खनालले नेपाली कांग्रेसमा संक्षिप्त समय काम गरेपछि पार्टी छोडेर अर्थतन्त्रको समीक्षा र अध्ययनमा सक्रिय रहँदै हालै ओली सरकारलाई प्रतिवेदन पनि बुझाइसकेका थिए।
स्रोतका अनुसार प्रधानमन्त्री कार्कीले बालेन शाहको प्रतिनिधिको रूपमा संसद् विघटनमा भूमिका खेलेका कानुनविद् ओमप्रकाश अर्याललाई पनि मन्त्री बनाउन प्रयास गरिरहेकी छन्। अर्यालले संसद् विघटनको प्रक्रियासम्म छलफलमा कानुनी सल्लाह दिने भूमिका खेलेका थिए।
त्यस्तै, मन्त्रीमा बालानन्द शर्मा र रमेश खरेलको नामसमेत चर्चामा रहेको छ, तर यी निर्णय अझै पक्का भएको छैन।
तपाईको प्रतिक्रिया दिनुहोस