रवि लामिछानेको मुद्दा फिर्ता निर्णयविरुद्धको रिटमा आज सर्वोच्चमा सुनुवाइ हुँदै
राष्ट्रिय स्वतन्त्र पार्टी (रास्वपा) का सभापति रवि लामिछाने विरुद्ध सहकारी ठगीसँगै दायर गरिएको सङ्गठित अपराध र सम्पत्ति शुद्धीकरणसम्बन्धी अभियोग पत्र फिर्ता गर्ने निर्णयविरुद्ध परेको रिटमा आज सर्वोच्च अदालतमा सुनुवाइ हुने भएको छ।
सर्वोच्च अदालतले उक्त रिटलाई न्यायाधीश सपना प्रधान मल्ल र न्यायाधीश श्रीकान्त पौडेल को संयुक्त इजलासमा सुनुवाइका लागि पेसी तोकेको हो।
महान्यायाधिवक्ता सविता भण्डारीले लामिछानेमाथि विभिन्न जिल्लामा विचाराधीन रहेको सहकारी ठगीसँगै जोडिएका सङ्गठित अपराध र सम्पत्ति शुद्धीकरणका मुद्दा संशोधन गर्न जिल्ला सरकारी वकिल कार्यालयहरूलाई निर्देशन दिएपछि उक्त निर्णयविरुद्ध रिट दायर गरिएको थियो।
उक्त निर्णयविरुद्ध वरिष्ठ अधिवक्ता दिनेश त्रिपाठी, कानुनका विद्यार्थी आयुष बडाल र युवराज पौडेल सफल ले सर्वोच्च अदालतमा रिट दायर गरेका हुन्।
महान्यायाधिवक्ता भण्डारीले पुस ३० गते जारी गरेको सात पृष्ठ लामो ‘टिप्पणी र आदेश’मार्फत लामिछानेविरुद्ध सहकारी ठगीको मुद्दा मात्र अघि बढाउने र अन्य दुई गम्भीर प्रकृतिका मुद्दा हटाउन जिल्ला सरकारी वकिल कार्यालयहरूलाई निर्देशन दिएकी थिइन्।
उक्त निर्देशनअनुसार कास्की जिल्ला अदालत र रुपन्देही जिल्ला अदालत मा निवेदन पेस गरिए पनि सर्वोच्च अदालतमा मुद्दा विचाराधीन रहेकाले सुनुवाइ हुन सकेको छैन।
यद्यपि महान्यायाधिवक्ता कार्यालयको निर्देशनअनुसार काठमाडौँ जिल्ला अदालत र पर्सा जिल्ला अदालत का सरकारी वकिल कार्यालयले भने लामिछानेसहितको अभियोग पत्र संशोधनका लागि अझै निवेदन दिएका छैनन्।
धेरै पढिएका
तपाईको प्रतिक्रिया दिनुहोस