भारतमा पछिल्लो समय चर्चामा रहेको विभिन्न परीक्षा तथा भर्ती प्रक्रियाको 'पेपर लिक' प्रकरणलाई लिएर केन्द्रीय शिक्षा मन्त्री धर्मेन्द्र प्रधानको राजीनामा माग गर्दै 'कक्रोच जनता पार्टी'ले शनिबार दिल्लीको जन्तर–मन्तरमा ५ घण्टा लामो विरोध प्रदर्शन गरेको छ । पार्टीका संस्थापक अभिजीत दीपकेको नेतृत्वमा भएको उक्त प्रदर्शनमार्फत मन्त्रीलाई राजीनामा दिन ५ दिनको अल्टिमेटम (समयसीमा) दिइएको छ । तोकिएको समयभित्र माग पूरा नभए आगामी शनिबार (१३ जुन) पुनः जन्तर–मन्तरमा भेला भई देशव्यापी आन्दोलन चर्काउने घोषणा पार्टीले गरेको छ ।

विरोध प्रदर्शनमा सहभागी हुन अमेरिकाबाट शनिबार बिहानै दिल्ली उत्रिएका अभिजीत दीपके विमानस्थलबाट सिधै जन्तर–मन्तर पुगेका थिए । हातमा डा. बी.आर. अम्बेडकरको आत्मजीवनी र भारतीय संविधानको प्रतिलिपि बोकेर पुगेका उनले बिहान १० बजेदेखि दिउँसो ३ बजेसम्मको अवधिमा ५ पटक संक्षिप्त सम्बोधन गर्दै शिक्षा मन्त्रीको राजीनामाका लागि दबाब दिएका थिए । साँझ ५ बजेसम्म प्रदर्शन गर्ने अनुमति भए तापनि दिउँसो ३ः३० बजेतिर दीपकेको स्वास्थ्य अवस्था बिग्रेपछि कार्यक्रम केही समय अगावै स्थगित गरिएको थियो । स्वास्थ्यमा समस्या देखिएपछि उनी सामाजिक अभियन्ता सोनम वाङ्गचुकका साथ प्रदर्शनस्थलबाट बाहिरिएका थिए ।

उक्त विरोध प्रदर्शनमा सामाजिक अभियन्ता सोनम वाङ्गचुकका साथै सीपीआई (एमएल) लिबरेसनका महासचिव दीपाङ्कर भट्टाचार्य, सीपीआई नेत्री एनी राजा र विभिन्न वामपन्थी विद्यार्थी तथा युवा संगठनका कार्यकर्ताहरूको बाक्लो उपस्थिति रहेको थियो । मञ्चबाट सम्बोधन गर्दै सोनम वाङ्गचुकले शान्तिपूर्ण प्रदर्शनका लागि अपिल गरेका थिए । कार्यक्रममा ककरोच जनता पार्टीका प्रवक्ता आशुतोष राङ्का पनि सहभागी थिए, जो आईआईटी कानपुरबाट दीक्षित भई गत वर्ष मात्र लण्डनबाट भारत फर्किएका हुन् ।

प्रदर्शनलाई मध्यनजर गर्दै दिल्ली प्रहरीले सुरक्षा व्यवस्था निकै कडा पारेको थियो । इन्दिरा गान्धी विमानस्थल, मुख्य रेलवे स्टेशन, बस पार्क र दिल्लीका सीमानाकाहरूमा १ हजारभन्दा बढी प्रहरी जवान परिचालन गरिएको थियो । बजार र संवेदनशील क्षेत्रमा शान्ति सुरक्षा कायम राख्न प्रहरीले विशेष सतर्कता अपनाएको थियो । प्रदर्शन सकिएपछि दिल्ली प्रहरीले सामाजिक सञ्जालमा फैलिएका हल्लाहरूको खण्डन गर्दै प्रदर्शनकारीहरू विरुद्ध कुनै पनि एफआईआर (जाहेरी) दर्ता नगरिएको स्पष्ट पारेको छ । प्रदर्शनस्थलबाट बाहिरिएपछि अभिजीत दीपकेले आफू आमाबुबालाई भेट्न घर जान लागेको जानकारी सामाजिक सञ्जालमार्फत दिएका छन् ।