नेपाली कम्युनिस्ट पार्टी (नेकपा) का सांसद वर्षमान पुनले मुगुका युवा गणेश नेपालीको आत्मदाह प्रकरणलाई लिएर सरकारसँग जवाफ माग गरेका छन् । शुक्रबार बसेको प्रतिनिधिसभा बैठकमा बोल्दै सांसद पुनले प्रधानमन्त्री बालेन शाहकै एउटा पुरानो फेसबुक स्ट्याटस संसद्‌मा पढेर सुनाउँदै सरकारको ध्यानाकर्षण गराएका हुन् ।

वि.सं. २०७९ माघ १० गते इलामका युवा कृषक प्रेम प्रसाद आचार्यले नयाँ बानेश्वरमा आत्मदाह गर्दा काठमाडौँ महानगरपालिकाका तत्कालीन मेयर बालेन शाहले सामाजिक सञ्जालमा एउटा भावुक र आक्रोशित पोस्ट गरेका थिए । सांसद पुनले प्रधानमन्त्री शाहको त्यही '२६ जनवरी २०२३' को पोस्ट संसद्‌मा उद्धृत गरे ।

बालेनको पुरानो स्ट्याटस उद्धृत गर्दै पुनले रोष्ट्रमबाट भने - "गणेश नेपालीको घटनाले स्तब्ध बनाएको छ, म उहाँप्रति श्रद्धाञ्जली व्यक्त गर्छु । यो सन्दर्भमा अहिले सामाजिक सञ्जालमा भाइरल भइरहेको सम्माननीय प्रधानमन्त्रीज्यूको एउटा स्ट्याटस छोटोमा उद्धृत गर्न चाहन्छु– 'एक जना नागरिक आफूले देखेको प्रगतिको चाहनाका लागि सक्दो कर्म गर्छन् । एक जना नागरिक आफूले चिनेको वा जानेको सबैलाई आफ्नो विगत र आगत वर्णन गरेर आत्महत्या गर्न लागेको खबर गर्छन् । एक जना नागरिक संसद् भवन अगाडि आफूमाथि पेट्रोल खन्याएर आत्मदाह गर्छन् । त्यो आत्मदाहका धेरै कारण, धेरै संकेतहरू होलान् । तर, सबैभन्दा ठूलो कारण राज्य हो र सबैभन्दा भयानक संकेत राज्यको चरम असफलता हो ।' "

प्रधानमन्त्रीकै विगतको भनाइलाई आधार बनाउँदै सांसद पुनले अहिलेको घटनामा सरकारको धारणा के हो भनी प्रश्न गरे । "गणेश नेपालीको आत्मदाह प्रकरणबारे पनि प्रधानमन्त्रीज्यूको त्यही धारणा छ कि परिवर्तन भयो ? के यो पनि राज्यको असफलता हो ?" पुनले प्रश्न गरे ।

नयाँ जनमत र ठूलो विश्वासका साथ प्रधानमन्त्री सत्तामा आएको उल्लेख गर्दै पुनले थपे, "के यो राज्यको असफलता हो ? या गरिब, दुःखी, सुकुम्बासीहरू संघीय राजधानी वा देशभरि बाँच्न पाउँदैनन्, उनीहरूले गरिखान पाउँदैनन् भन्ने संकेत हो ? सरकारको यसमा गम्भीर ध्यान जाओस् र म संसद्‌मा यसको जवाफ चाहन्छु । हिजो नागरिक हुँदाको त्यही दृष्टिकोण आज सत्तामा गइसकेपछि पनि कायम छ कि बदलियो ?"