नेपाली कांग्रेसले आफ्नो आगामी १५ औँ महाधिवेशनको प्रक्रियालाई तीब्र पार्दै सातै प्रदेशका लागि निर्वाचन संयोजकहरू तोकेको छ। महाधिवेशनको आन्तरिक प्रक्रियालाई थप सहज र व्यवस्थित बनाउन केन्द्रीय निर्वाचन समितिले वरिष्ठ अधिवक्ताहरूलाई प्रदेश संयोजकको जिम्मेवारी दिएको हो।

केन्द्रीय निर्वाचन समितिका संयोजक प्रेमबहादुर खड्काका अनुसार पार्टीको महाधिवेशन प्रक्रियालाई निष्पक्ष र पारदर्शी रूपमा सम्पन्न गर्न सबै प्रदेशमा अनुभवी कानुनविद्हरूलाई पठाइएको छ।

कुन प्रदेशमा कसको जिम्मेवारी?
कांग्रेसले तोकेको नयाँ जिम्मेवारी अनुसार सातै प्रदेशका संयोजकहरू यसप्रकार रहेका छन्:

कोशी प्रदेश: डिल्लीबहादुर कार्की

मधेश प्रदेश: बलराम सुवेदी

बागमती प्रदेश: कृष्ण अर्याल

गण्डकी प्रदेश: जगन्नाथ ढकाल

लुम्बिनी प्रदेश: दीपकुमार रेग्मी

कर्णाली प्रदेश: उत्तम आचार्य

सुदूरपश्चिम प्रदेश: गङ्गाराम पाध्याय

यसैबीच, हालसालैको बाढीबाट प्रभावित बनेका जिल्लाहरू रसुवा, नुवाकोट र धादिङको हकमा भने त्यहाँ खटाइएका निर्वाचन अधिकृत र स्थानीय पार्टी तहसँग समन्वय गरेर मात्र अधिवेशनका प्रक्रिया अगाडि बढाउन निर्देशन दिइएको छ।

जिल्ला र प्रदेश अधिवेशनको विस्तृत समयतालिका भने केन्द्रीय निर्वाचन समितिले पछि सार्वजनिक गर्ने जनाएको छ।