नेपाली कांग्रेसको शेरबहादुर देउवा समूहले आगामी १५औँ केन्द्रीय महाधिवेशनको तयारीलाई तीव्र पार्दै देशैभर जिल्लागत संयोजकहरू तोकेको छ। निर्धारित कार्यतालिका अनुसार १५औँ केन्द्रीय महाधिवेशन आगामी मंसीर २१, २२ र २३ गते राजधानी काठमाडौंमा हुनेछ।

महाधिवेशनलाई व्यवस्थित र सफल रूपमा सम्पन्न गर्न नेता शशांक कोइरालाको संयोजकत्वमा जिल्ला तयारी समितिहरू गठन गरिएको छ। ती समितिहरूले मातहतका सबै तहमा अर्थात् प्रतिनिधिसभा निर्वाचन क्षेत्र, प्रदेशसभा निर्वाचन क्षेत्र, पालिका र वडा तहसम्मै तयारी समितिहरू निर्माण गरिसकेका छन्।

महाधिवेशनको संशोधित कार्यतालिका
असोज १५: वडा अधिवेशन

असोज २०: पालिका अधिवेशन

असोज २३: प्रदेशसभा निर्वाचन क्षेत्रीय अधिवेशन

मंसीर ४: प्रदेश अधिवेशन

महाधिवेशन प्रक्रियालाई निष्पक्ष र व्यवस्थित बनाउन केन्द्रीय निर्वाचन समितिको तर्फबाट ७७ वटै जिल्लामा निर्वाचन अधिकृतहरू खटाइसकिएको छ। तल्लो तहबाटै नेतृत्व चयनको प्रक्रिया सुरु भएसँगै कांग्रेसभित्र चुनावी सरगर्मी बढेको छ।