नेपाली काङ्ग्रेसको १५औँ महाधिवेशनबाट निर्वाचित नयाँ केन्द्रीय कार्यसमितिले आजदेखि विधिवत् रूपमा पार्टी सञ्चालनको सम्पूर्ण जिम्मेवारी सम्हाल्दै छ। नवनिर्वाचित पदाधिकारी तथा केन्द्रीय सदस्यहरूको पद तथा गोपनीयताको शपथ ग्रहण, प्रमाणपत्र वितरण र पदबहाली आज एकैसाथ हुन लागेको हो।

ललितपुरको सानेपास्थित केन्द्रीय कार्यालयमा दिउँसो २ बजे आयोजना गरिने विशेष समारोहमा निर्वाचन समितिले नवनिर्वाचित नेताहरूलाई शपथ गराउने कार्यक्रम छ। केन्द्रीय निर्वाचन समितिका अनुसार नवनिर्वाचित सभापति गगनकुमार थापाले दसैँको फूलपातीका दिन (असोज ३१ गते) नै शपथ लिइसक्नुभएकाले आज बाँकी सम्पूर्ण पदाधिकारी तथा केन्द्रीय सदस्यहरूले मात्र शपथ लिनेछन्। निर्वाचन समितिका सदस्य सचिव अधिवक्ता राजु कटुवालले यसपटकको शपथ ग्रहण कार्यक्रम विगतभन्दा फरक र व्यवस्थित ढाँचामा सम्पन्न गरिन लागेको जानकारी दिनुभयो।

गत असोज १८ देखि २३ गतेसम्म काठमाडौँमा सम्पन्न १५औँ महाधिवेशनअन्तर्गत भएको निर्वाचनको अन्तिम नतिजा असोज ३० गते औपचारिक रूपमा सार्वजनिक गरिएको थियो।

शपथ ग्रहण र पदबहालीलगत्तै आजै सानेपामा नयाँ केन्द्रीय कार्यसमितिको पहिलो बैठक बस्ने तयारी गरिएको छ। उक्त बैठकले ऐतिहासिक महाधिवेशन सम्पन्न गराउन सहयोग गर्ने महाधिवेशन प्रतिनिधि, निर्वाचन समिति, सुरक्षाकर्मी, सञ्चारकर्मी तथा पार्टी पंक्तिलाई धन्यवाद ज्ञापन गर्नेछ। साथै, विधान अनुसार बाँकी सदस्यहरूको मनोनयन प्रक्रिया तथा बाँकी रहेका जिल्ला र प्रदेश अधिवेशनहरूका विषयमा समेत प्रारम्भिक छलफल गरिने नेताहरूले जनाएका छन्।