ब्राजिलको राष्ट्रपतीय निर्वाचनमा पराजित भएसँगै कानुनी समस्यामा परेका सिनेटर फ्लेभियो बोल्सोनारो देश छाडेर अमेरिका प्रस्थान गरेका छन्। ब्राजिलको सर्वोच्च अदालतले सम्पत्ति शुद्धीकरणसम्बन्धी अनुसन्धानका क्रममा राहदानी बुझाउन आदेश दिएको समयसीमा सकिएलगत्तै उनी अमेरिका पुगेका हुन्।

अक्टोबर २५ मा सम्पन्न दोस्रो चरणको मतदानमा वर्तमान राष्ट्रपति लुइज इनासियो लुला दा सिल्भासँग ४४ लाखभन्दा बढी मतान्तरले पराजित भएपछि उनीमाथि कानुनी दबाब बढेको थियो। पूर्वराष्ट्रपति जाइर बोल्सोनारोका ४५ वर्षीय ज्येष्ठ सुपुत्र फ्लेभियोले चुनावी हार स्वीकार गर्न अस्वीकार गर्दै परिणाम रद्द गर्नुपर्ने माग गर्दै आएका थिए।

सर्वोच्च अदालतका न्यायाधीश अलेक्झाण्डर दे मोराएसले मङ्गलबार मध्याह्नसम्म फ्लेभियोलाई आफ्ना राहदानीहरू अदालतसमक्ष बुझाउन र देश छाडेर जान प्रतिबन्ध लगाउने आदेश दिएका थिए। तर, राहदानी बुझाउने समयसीमा सकिनुअघि नै उनी ब्राजिल छाडेर अमेरिकातर्फ लागेका हुन्।

उनी अर्जेन्टिनाको बाटो हुँदै अमेरिका गएको आशङ्कामा ब्राजिलियन सङ्घीय प्रहरीले अर्जेन्टिनी अधिकारीहरूसँग सोधपुछ समेत गरेको थियो। यद्यपि, फ्लेभियो र उनका परिवारलाई अमेरिका प्रवेशका लागि भिसा उपलब्ध गराइने अमेरिकी विदेश मन्त्रालयका वरिष्ठ अधिकारीले पुष्टि गरेका थिए । बीबीसीका अनुसार उनी फ्लोरिडा पुगेर आफ्ना भाइ एडुआर्डोसँग भेटिसकेका छन्।

यसअघि सोमबार सामाजिक सञ्जालमा भिडियो सन्देश जारी गर्दै फ्लेभियोले आफू देश छाडेर जाने सोचमा नरहेको र कानुनी प्रक्रियामा सहयोग गर्ने बताएका थिए। तर, भिडियो सार्वजनिक भएको २४ घण्टा नबित्दै उनी विदेश पलायन भएका हुन्। उनीमाथि रियो दि जेनेरियोमा डिजिटल भुक्तानी प्लेटफर्म र सट्टेबाजी (Betting) क्षेत्रमार्फत सम्पत्ति शुद्धीकरण गरेको अभियोगमा अनुसन्धान भइरहेको छ।

फ्लेभियो बोल्सोनारोको अमेरिका प्रस्थानलाई लिएर हालै निर्वाचित राष्ट्रपति लुइज इनासियो लुला दा सिल्भाले कडा शब्दमा आलोचना गरेका छन्। आफ्नो ८१औँ जन्मदिनका अवसरमा बोल्दै राष्ट्रपति लुलाले बोल्सोनारो परिवारले ब्राजिलको हितभन्दा अमेरिकाको चाकरी गरेको आरोप लगाएका छन् । “यदि उनीसँग लुकाउनुपर्ने केही थिएन भने देशमै बसेर कानुनी प्रक्रिया र अदालतको सामना गर्नुपर्थ्यो” लुलाले भने।

यसैबिच, अमेरिकी राष्ट्रपति डोनाल्ड ट्रम्पले ब्राजिलको भर्खरै सम्पन्न निर्वाचनलाई धाँधलीपूर्ण रहेको आरोप लगाउँदै बोल्सोनारो परिवारको बचाउ गरेका छन्।