पूर्वराष्ट्रपति विद्यादेवी भण्डारीको नेकपा एमालेको सक्रिय राजनीतिमा सम्भावित पुनरागमनले पार्टीभित्र आन्तरिक संघर्ष र रणनीतिक द्धन्द्व चुलिएको छ । मदन भण्डारी फाउन्डेसनले भोलि शनिबार काठमाडौंको राष्ट्रिय सभागृहमा आयोजना गर्न लागेको मदन स्मृति दिवसको कार्यक्रम एमालेको आन्तरिक जीवनमा निकै अर्थपूर्ण मोड बन्ने देखिएको छ ।

प्रधानमन्त्री तथा पार्टी अध्यक्ष केपी शर्मा ओलीको असहजताका बीच पूर्वराष्ट्रपति भण्डारीले सोही कार्यक्रममा सक्रिय राजनीतिमा पुन: प्रवेशको घोषणा गर्ने तयारी गरिरहेको उनी निकट नेताहरूले बताएका छन् । एमाले स्थायी कमिटी सदस्य कर्णबहादुर थापाका अनुसार, भण्डारीले अध्यक्ष ओलीलाई भेटेर आफूलाई पार्टी राजनीतिमा फर्कन सहयोग गर्न आग्रह गरिसकेकी छिन् ।

यद्यपि एमालेको सचिवालयमा भने भण्डारीको पुनरागमनलाई लिएर गम्भीर बहस शुरु भइसकेको छ । महासचिव शंकर पोखरेलले सचिवालयको ५३औँ बैठकमा पार्टी विधानमै व्यवस्था गरेर पूर्वराष्ट्रपतिलाई सक्रिय राजनीतिमा फर्कन रोक्नुपर्ने प्रस्ताव अघि सारेका थिए । उनले गणतन्त्रप्रति चौतर्फी प्रहार भइरहेका बेला पूर्वराष्ट्रपति पुनः पार्टी राजनीतिमा फर्केमा गलत सन्देश जाने तर्क गरेका थिए ।

तर सचिवालयमा पोखरेलको प्रस्तावको समर्थनमा कुनै नेताले साथ नदिएको जानकारी प्राप्त भएको छ । उपाध्यक्ष सुरेन्द्र पाण्डे, युवराज ज्ञवाली, गोकर्ण विष्टलगायत नेताहरूले व्यक्तिविशेषलाई लक्षित गर्दै विधान संशोधन गर्नु अनुचित हुने धारणा राखेका थिए ।

स्रोतका अनुसार, अन्त्यमा अध्यक्ष ओलीले स्वयं हस्तक्षेप गर्दै “व्यक्तिलाई लक्षित गरेर विधान संशोधन आवश्यक छैन” भन्ने भनाइ राखेपछि विषय 'सेफ ल्याण्डिङ' गरिएको हो । तर, धेरै नेताहरूको बुझाइमा यो प्रस्ताव ओलीकै चाहनाअनुसार महासचिव पोखरेलले अघि सारेको हुन सक्ने अनुमान गरिएको छ ।

पार्टी सदस्यता नवीकरण पनि अर्को विवादको बिन्दु बनेको छ । भण्डारी पक्षका नेताहरूले सदस्यता नवीकरण भइसकेको दाबी गरे पनि ओली पक्षका नेताहरूले त्यो प्रक्रिया नै गलत भएको तर्क गर्दै छन् । संगठन विभागका सचिव माधव ढुंगेलले भण्डारीको सदस्यता नवीकरण प्रक्रिया चलिरहेको बताएका छन् भने ओली पक्षले केन्द्रको स्वीकृति बिना गरिएको नवीकरणलाई अमान्य ठहर गर्दै सदस्यता ‘होल्ड’मा राखिएको जनाएका छन् ।

ओली समूहका नेताहरूले पार्टीमा वैकल्पिक शक्ति नआओस् भन्ने उद्देश्यले भण्डारीको पुनरागमन रोक्ने रणनीति अख्तियार गरेको बताइन्छ । अर्कोतर्फ, भण्डारी समर्थकहरूले भने उनलाई पार्टीभित्र फर्काएर नेतृत्वमा विविधता र वैचारिक सन्तुलन आवश्यक रहेको तर्क गरिरहेका छन् ।

भोलि हुने शनिबारको कार्यक्रमले एमालेको आन्तरिक शक्ति सन्तुलनमा कस्तो असर पार्नेछ भन्ने चासो देशभर बढ्दो छ । ओली र भण्डारीबीचको सम्बन्ध, पार्टी विधान संशोधनको सम्भावना, र गणतन्त्रप्रतिको दृष्टिकोण यी सबै पक्षले एमालेको आगामी राजनीति तय गर्नेछ ।