रामेछापको मन्थली नगरपालिका–६ मसानेटारमा मंगलबार भएको बस दुर्घटनाको सत्यतथ्य छानबिन गर्न माग गर्दै स्थानीयवासीले सडक अवरुद्ध गरेका छन्। दुर्घटनामा १२ जनाको ज्यान गएको भए पनि स्थानीय प्रशासन र अरनिको यातायात समितिले चासो नदेखाएको आरोप लगाउँदै उनीहरूले बुधबार बिहानदेखि सडक बन्द गराएका हुन्।

स्थानीयहरूले काठमाडौँबाट गएका सवारीसाधनलाई खुर्कोटमा, मन्थली भित्रिएका सवारीलाई मन्थली आकाशेमा र गाउँबाट छुटेका गाडीहरूलाई खिम्तीमै रोकेका छन्।

दुर्घटनाको निष्पक्ष छानबिन, मृतकका परिवारलाई उचित क्षतिपूर्ति, घाइतेको सहज उपचारलगायतका माग राख्दै आन्दोलनमा उत्रिएको स्थानीयवासीको भनाइ छ।

काठमाडौँबाट ओखलढुङ्गा जाँदै गरेको प्रदेश ३–०१–००५ ख ९९७५ नम्बरको बस मंगलबार तामाकोसी नदीमा खस्दा १२ जनाको मृत्यु भएको थियो।