साविक विजेता अर्जेन्टिनाले दुई गोलले पछि परेको स्थितिबाट अविश्वसनीय पुनरागमन गर्दै इजिप्टलाई ३–२ ले पराजित गरेको छ। यो रोमान्चक जितसँगै कप्तान लियोनल मेसीको विश्वकप यात्रा कायमै रहँदा अर्जेन्टिना प्रतियोगिताको क्वाटरफाइनलमा प्रवेश गरेको छ।

एटलान्टामा सम्पन्न अन्तिम–१६ को प्रतिष्पर्धात्मक खेलमा यासेर इब्राहिम र मोस्तफा जिकोले गोल गर्दै इजिप्टलाई २–० को बलियो अग्रता दिलाएका थिए। खेलको एक मोडमा मेसीले प्रहार गरेको पेनाल्टी इजिप्टका गोलकिपर मोस्तफा शोबेरले बचाएपछि अर्जेन्टिना थप संकटमा परेको थियो।

तर, खेलको अन्तिम ११ मिनेट र इन्जुरी समय अर्जेन्टिनाका लागि ऐतिहासिक साबित भयो। क्रिस्टियन रोमेरोले हेडरमार्फत गोल गर्दै अर्जेन्टिनाको पुनरागमनको ढोका खोले। त्यसपछि कप्तान मेसीले शानदार हाफ–भलीमार्फत गोल गर्दै खेललाई बराबरीमा ल्याए। इन्जुरी समयको दोस्रो मिनेटमा एन्जो फर्नान्डेजले उत्कृष्ट हेडर गोल गरेपछि अर्जेन्टिनाले ३–२ को रोमाञ्चक जित पक्का गर्‍यो।

मेसीको नयाँ कीर्तिमान: यो गोलसँगै मेसीले लगातार नवौं विश्वकप खेलमा गोल गर्ने अद्वितीय कीर्तिमान कायम गरेका छन्। साथै, जारी संस्करणमा आफ्नो गोल संख्या आठ पुर्‍याउँदै उनी गोल्डेन बुटको दौडमा पुनः अगाडि आएका छन्। खेल जितेपछि भावुक बनेका मेसीले आँसु झार्दै आफ्ना सहकर्मीहरूलाई अङ्गालो हालेका थिए।

भीएआर (VAR) विवाद र रातो कार्ड
पराजयपछि इजिप्टले रेफ्रीको निर्णयप्रति तीव्र असन्तुष्टि जनाएको छ। दोस्रो हाफको सुरुवातमै मोहम्मद सलाहको पासमा मोस्तफा जिकोले गरेको गोललाई भिडियो असिस्टेन्ट रेफ्री (भीएआर) ले फाउल देखाउँदै रद्द गरिदिएको थियो। उक्त निर्णय निकै विवादास्पद बन्यो। अर्जेन्टिनाको विजयी गोलपछि विरोधमा उत्रिएका इजिप्टको कोचिंग स्टाफका एक सदस्यले रातो कार्ड समेत पाए। अब अर्जेन्टिनाले शनिबार हुने क्वाटरफाइनलमा कोलम्बिया वा स्विट्जरल्यान्डमध्ये एकको सामना गर्नेछ।

यसअघि अन्तिम–३२ को खेलमा केप भर्डमाथि ३–२ को कठिन जित निकालेपछि प्रशिक्षक लियोनल स्कालोनीले टोलीमा केही परिवर्तन गरेका थिए। निकोलस टालियाफिको, लियान्द्रो परेडेस र जुलियन अल्भारेजलाई सुरुआती रोजाइमा राखिए पनि अर्जेन्टिनाले फेरि सुस्त सुरुआत गर्‍यो। मारवान अट्टियाको क्रसमा यासेर इब्राहिमले हेडमार्फत गोल गर्दै इजिप्टलाई सुरुवाती अग्रता दिलाएका थिए।

त्यसको पाँच मिनेटपछि टालियाफिकोलाई पेनाल्टी क्षेत्रमा हैसेम हसनले लडाएपछि अर्जेन्टिनाले पेनाल्टीको अवसर पायो। तर, मेसीको प्रहारलाई गोलकिपर शोबेरले उत्कृष्ट बचाउ गरे। विश्वकपमा मेसीले प्रहार गरेका आठ पेनाल्टीमध्ये यो चौथो असफल प्रहार हो। साथै, एउटै विश्वकप संस्करणमा दुई पेनाल्टी गुमाउने उनी पहिलो खेलाडी बनेका छन्। यसअघि उनले समूह चरणमा अस्ट्रियाविरुद्ध पनि पेनाल्टी चुकाएका थिए।

रोमाञ्चक अन्त्य
इजिप्टका गोलकिपर मोस्तफा शोबेरले खेलभर उत्कृष्ट प्रदर्शन गरे। उनले एलेक्सिस म्याक एलिस्टरको प्रहार र जुलियन अल्भारेजको शक्तिशाली प्रहारलाई शानदार रूपमा रोक्दै अर्जेन्टिनालाई लामो समय निराश पारेका थिए।

खेलको ६०औं मिनेटमा मोहम्मद सलाहको पासमा मोस्तफा जिकोले गोल गर्दै इजिप्टको अग्रता दोब्बर बनाएका थिए। तर, आक्रमणको सुरुआतमा लिसान्द्रो मार्टिनेजमाथि फाउल भएको भन्दै भीएआरले उक्त गोललाई मान्यता दिएन। यद्यपि, त्यसको केहीबेरपछि सलाहकै पासमा हैसेम हसनको क्रसलाई सदुपयोग गर्दै जिकोले गोल गरेर इजिप्टलाई २–० को स्थितिमा पुर्‍याए।

दोस्रो हाफको ‘कुलिङ ब्रेक’ सम्म आइपुग्दा मेसी लगायत अर्जेन्टिनाका खेलाडीहरू निराश देखिन्थे। तर, त्यसपछि रोमेरोको गोलले टोलीमा नयाँ ऊर्जा थप्यो। लगत्तै मेसीको पासमा लाउटारो मार्टिनेजको हेडर क्रसबार नजिकैबाट बाहिरियो।

खेल सकिन सात मिनेट बाँकी छँदा गोन्जालो मोन्टिएलको पासमा मेसीले हाफ–भलीमार्फत उत्कृष्ट गोल गर्दै खेल २–२ को बराबरीमा ल्याए। शोबेरले बल छोए पनि रोक्न सकेनन् र बल बारमा लाग्दै जाली चुम्न पुग्यो। यो मेसीको विश्वकप इतिहासकै २१औं गोल थियो। अन्ततः इन्जुरी समयको दोस्रो मिनेटमा लाउटारो मार्टिनेजको क्रसमा एन्जो फर्नान्डेजले शक्तिशाली हेडर गोल गर्दै अर्जेन्टिनाको अविश्वसनीय र ऐतिहासिक जित सुनिश्चित गरे।