१३औं सागमा स्वर्ण जित्दै कुसुम र काजलको प्रेरणादायी यात्रा
.png)
नेपालले सन् २०१९ मा भएको १३औं दक्षिण एसियाली खेलकुद प्रतियोगिता (साग) मा ५१ स्वर्ण जितेर ऐतिहासिक उपलब्धि हासिल गर्यो। ती ५१ स्वर्णमध्ये एउटा स्वर्ण जिताउने खेलाडी थिइन्, चौतारा साँगाचोकगढी नगरपालिका–६, पीपलडाँडाकी २७ वर्षीया कुसुम खड्का। करातेमा उत्कृष्ट प्रदर्शन गर्दै स्वर्ण जित्न सफल कुसुमले आफ्नो यात्रा १२ वर्षको उमेरमा सुरु गरेकी थिइन्।
कुसुमको परिवार पछि काठमाडौंको बौद्धमा सरेपछि उनको कराते यात्रा नयाँ मोडमा प्रवेश गर्यो। बौद्ध डोजोमा भर्ना भएकी कुसुमले साथीहरूसँग रमाइलोका लागि कराते सिक्न थालेकी थिइन्, तर समयसँगै करातेमा उनको गहिरो रुचि विकसित भयो। प्रारम्भिक दिनमा उनले नमिठो हार बेहोर्नुपरे पनि, हारले उनलाई अझ मिहिनेत गर्न प्रेरित गर्यो। उनले भनेकी छन्, "हारेपछि पनि मिहिनेत गरेर मेडल जित्ने आत्मविश्वास पलायो।"
कुसुमको सफलता भने उतारचढावपूर्ण रह्यो। पहिलो राष्ट्रिय टिम छनोट प्रतियोगितामा प्रथम हुँदै राष्ट्रिय टिममा छानिएपछि, दोस्रो प्रतियोगितामा उनले फाइनलमा हार भोग्नु परेको थियो। त्यो हारले उनलाई झन् मिहिनेत गर्न प्रेरित गर्यो। अन्ततः १३औं सागमा उनले स्वर्ण पदक जितेर नेपाललाई गर्वको क्षण प्रदान गरिन्।
रेफ्रीको यात्रा
खेलाडीका रूपमा सफलता हासिल गरेपछि कुसुमको ध्यान रेफ्रीको भूमिकातर्फ मोडियो। छैटौं राष्ट्रिय रेफ्री सेमिनारमा उत्कृष्ट प्रदर्शन गर्दै उनले राष्ट्रिय रेफ्रीको यात्रा सुरु गरिन्। अब कुसुमको लक्ष्य अन्तर्राष्ट्रिय रेफ्री बन्ने हो। उनले भनेकी छन्, "खेलकुदले मलाई परिपक्व बनायो। करातेमा अझ गहिरो समझ बढ्यो, र अबको गन्तव्य अन्तर्राष्ट्रिय रेफ्री बन्नु हो।"
काजल श्रेष्ठको तेक्वान्दो यात्रा
१३औं सागमा स्वर्ण जित्दै नेपाललाई गौरवान्वित बनाउने अर्की खेलाडी हुन्, लिशंखुपाखर गाउँपालिका–५, जेठलकी २६ वर्षीया काजल श्रेष्ठ। उनले कक्षा ८ मा तेक्वान्दो खेल्न सुरु गरेकी थिइन्। प्रारम्भदेखि नै उनी अन्तर्राष्ट्रिय तेक्वान्दो रेफ्री बन्ने सपनासहित अघि बढेकी थिइन्। सागको सफलताले उनको सपना अझ सुदृढ बनायो।
काजलले विभिन्न राष्ट्रिय र अन्तर्राष्ट्रिय प्रतियोगितामा सहभागी हुँदै सफलता हासिल गरेकी छिन्। उनले ताइवान, अजरबैजान, मलेसिया लगायतका मुलुकहरूमा प्रतियोगितामा भाग लिँदै स्वर्ण पदक जितेकी छन्। उनी अन्तर्राष्ट्रिय तेक्वान्दो रेफ्री सेमिनारमा सहभागी हुँदै अन्तर्राष्ट्रिय मान्यता प्राप्त रेफ्री बनिन्।
उनले भनेकी छन्, "तेक्वान्दोप्रतिको मेरो सम्मान अझ बढेको छ। खेलाडी र रेफ्री दुवैको भूमिकामा सफलताको बाटो हिंड्न पाउँदा गर्व लाग्छ।"
खेलाडीप्रतिको सम्मान र सरकारको भूमिका
कुसुम र काजलले खेल क्षेत्रमा महत्वपूर्ण सफलता हासिल गरेका छन्। तर, दुवैले खेलाडीहरूको लागि नेपालमा पर्याप्त अवसर र प्रोत्साहन नपाएको महसुस गरेका छन्। कुसुमले भनिन्, "सम्भावना बोकेका धेरै खेलाडी विदेश गइरहेका छन्, जसमा सरकारले तत्कालै ध्यान दिनुपर्ने देखिन्छ। खेलाडीहरूको मिहिनेतलाई सरकारले प्रोत्साहन गर्नु आवश्यक छ।"
दुवै खेलाडीको संघर्ष र सफलताले नेपालमा खेलकुद क्षेत्रमा अझ धेरै सम्भावनाहरू रहेको प्रमाणित गर्छ। उनीहरूको यात्रा प्रेरणादायी छ, र आगामी पुस्ताका खेलाडीहरूलाई मार्गदर्शन गर्नेछ।
तपाईको प्रतिक्रिया दिनुहोस