सुडानको वायुसेनाले विद्रोही अर्धसैनिक समूह र्‍यापिड सपोर्ट फोर्स (आरएसएफ)को नियन्त्रणमा रहेको डार्फरको न्याला विमानस्थलमा आक्रमण गरेको छ। एक दिन अघि भएको यो आक्रमणमा युएईको एक सैन्य विमान ध्वस्त भएको र करिब ४० कोलम्बियाली भाडाका सैनिक मारिएको सुडानी अधिकारीहरूले बताएका छन्।

यस हमलामा भाडामा ल्याइएका हतियार पनि नष्ट गरिएको छ। आक्रमणलाई विद्रोही र विदेशी हस्तक्षेप विरुद्धको कडा सन्देशको रूपमा व्याख्या गरिएको छ। यद्यपि युएईको विदेश मन्त्रालय र आरएसएफबाट कुनै प्रतिक्रिया प्राप्त भएको छैन।

कोलम्बियाका राष्ट्रपति गुस्ताभो पेट्रोले यस घटनाको स्वतन्त्र छानबिनका लागि आदेश दिएका छन् । गत वर्ष आरएसएफले न्याला शहर कब्जा गरेको थियो भने सुडानी सरकारले आरएसएफमाथि नागरिक विमानस्थललाई सैन्य आधारमा परिणत गरेको आरोप लगाएको छ।

डार्फर क्षेत्रमा हतियार र सुनको तस्करी भएको पनि सूचनाहरु छन्। संयुक्त राष्ट्रसंघका विज्ञहरूले अप्रिलमा जारी गरेको प्रतिवेदनमा कोलम्बियाका भाडाका सैनिकहरू डार्फरमा रहेको र निजी सुरक्षा कम्पनीमार्फत आरएसएफलाई सहयोग पुर्याइएको पुष्टि गरेका छन्।

यस आक्रमणको प्रतिकार स्वरूप युएईले सुडानी विमानहरूलाई प्रतिबन्ध लगाएको छ र सुडानको उड्डयन एजेन्सीले अबुधाबीबाट सुडानी विमानलाई उडान अनुमति नदिएको आरोप लगाएको छ। यी घटनाले सुडान–युएई सम्बन्ध पहिले नै तनावपूर्ण भएको अवस्थालाई अझै जटिल बनाएको छ ।  सुडानी सरकारले भने आरएसएफलाई युएईबाट समर्थन प्राप्त भएको आरोप लगाउँदै आएको छ।