कतारका प्रधानमन्त्री शेख मोहम्मद बिन अब्दुल रहमान अल थानीले आइतबार अन्तर्राष्ट्रिय समुदायलाई “दोहोरो मापदण्ड समाप्त गर्न” र इजरायललाई उसका “अपराधहरूको लागि सजाय दिन” आग्रह गरेका छन्।

दोहामा इजरायलले हमासका नेताहरूमाथि गरेको अभूतपूर्व हवाई आक्रमणपछि कतारले आयोजना गरेको अरब र इस्लामिक नेताहरूको आपतकालीन शिखर सम्मेलनको पूर्वसन्ध्यामा सम्पन्न तयारी बैठकमा उनले यस्तो बताएका हुन्।

थानीले भने, “अन्तर्राष्ट्रिय समुदायले अब दोहोरो मापदण्ड प्रयोग बन्द गर्नुपर्छ। इजरायलले गरेका सबै अपराधहरूको सजाय दिनुपर्ने समय आएको छ। इजरायलले कतारको छिमेकी प्यालेस्टिनी जनतालाई उनीहरूको भूमिबाट निष्कासन गर्ने उद्देश्य सफल पार्न सक्दैन।”

कतारको विदेश मन्त्रालयका प्रवक्ता माजिद अल–अन्सारीका अनुसार सोमबार हुने सम्मेलनमा “कतारमाथि इजरायली आक्रमणसम्बन्धी मस्यौदा प्रस्ताव” समेत प्रस्तुत हुने छ।

शिखर सम्मेलनमा इरानका राष्ट्रपति मसुद पेजेस्कियन, इराकी प्रधानमन्त्री मोहम्मद सिया अल–सुडानी र प्यालेस्टिनी राष्ट्रपति महमुद अब्बास सहभागी हुनेछन्। अब्बास आइतबार नै दोहा पुगेका छन्।

टर्कीका राष्ट्रपति रेसेप तैयप एर्दोगान पनि सम्मेलनमा उपस्थित हुने अपेक्षा गरिएको छ। त्यस्तै, साउदी अरबका क्राउन प्रिन्स मोहम्मद बिन सलमान यसअघि कतार भ्रमण गरिसकेका र सम्मेलनमा समेत सहभागी हुने जनाइएको छ।

यस क्षेत्रमा अमेरिकी सेनाको सबैभन्दा ठूलो अड्डा रहेको कतारले संयुक्त राज्य अमेरिका र इजिप्टसँग मिलेर इजरायल–हमास युद्धमा मध्यस्थताको महत्वपूर्ण भूमिका खेलेको छ।

हमासका पोलिटब्युरो सदस्य बासेम नईमले भने, शिखर सम्मेलनबाट इजरायल–हमास युद्धबारे “निर्णायक र एकीकृत अरब–इस्लामिक दृष्टिकोण” तथा “स्पष्ट र ठोस उपायहरू” बाहिर आउने अपेक्षा गरिएको छ।