नेपाली कांग्रेसको काठमाडौँमा जारी १५औँ महाधिवेशनअन्तर्गत केन्द्रीय कार्यसमितिको निर्वाचनको मतगणना कार्य तीव्रताका साथ अघि बढेको छ।

केन्द्रीय निर्वाचन समितिका सदस्य सचिव राजु कटुवालका अनुसार असोज २३ गते बेलुकी ९ बजेदेखि सुरु भएको मतगणना प्रक्रिया अन्तर्गत हाल उपसभापति र महामन्त्री पदको मतगणना भइरहेको छ।

यसैबीच, आज बिहान ११ बजेदेखि सहमहामन्त्री (महिला), सहमहामन्त्री (खुला) र केन्द्रीय सदस्य (महिला खुला) पदको मतगणना सुरु गरिनेछ। त्यसैगरी, दिउँसो १२ बजेदेखि सहमहामन्त्री (आदिवासी जनजाति), केन्द्रीय सदस्य (आदिवासी जनजाति खुला) र केन्द्रीय सदस्य (आदिवासी जनजाति महिला) पदको मतगणना सानेपास्थित कांग्रेस केन्द्रीय कार्यालयमा सुरु हुने निर्वाचन समितिले जनाएको छ।

मतगणना स्थलको व्यवस्थापनबारे जानकारी दिँदै समितिले सहमहामन्त्री पदका उम्मेदवारका लागि मतगणना स्थलमा २ जना प्रतिनिधि राख्न पाउने व्यवस्था गरेको छ। केन्द्रीय सदस्यका उम्मेदवारहरूको हकमा भने उम्मेदवार स्वयं मात्र गणना स्थलमा उपस्थित हुन पाउनेछन्।